Rusiyadan azərbaycanlı köçü başlayır

İqtisadi böhran qonşu ölkədə çalışan həmyerlilərimizi geri dönməyə məcbur edib

Rusiyada iqtisadi çətinlikdən dolayı işləyən azərbaycanlıların dünəndən etibarən köçü başlayıb. Politika.az xəbər verir ki, bu köçün başlamasına səbəb qonşu ölkədə iqtisadi vəziyyətin ağırlaşması və bundan sonrakı mərhələdə də prosesin durmayacağıdır. 

Məlumatlarda qeyd olunur ki, artıq iki gündür Moskva və Rusiyanın daha bir neçə iri şəhərindən Azərbaycana gəlmək istəyən həmyerlilərimiz bilet belə tapa bilmirlər. Yalama Gmrüyündən şəxsi avtomobil və piyada keçənlərin sayı isə əvvəlki günlərə nisbətdə bir neçə dəfə artıb. 

Politika.az ötən günlərdə ölkəmizə təşrif buyurmuş həmyerlilərimizin bir neçəsi ilə məsələ ilə əlaqədar danışıb. Onlar bildiriblər ki, artıq Rusiyada yaşamaq və işləmək olmur. “Çünki rusların bizə olan münasibəti daha əvvəlki kimi deyil. Həmçinin iqtisadiyyt çökdükdə qazanc da azalır. Əgər orada işlədiyimizin yarısı qədər Bakıda işləsək, daha artıq pul qazana bilərik”. 

Həmsöhbətlərimiz daha sonra bildirirlər ki, bəziləri Novruz Bayramına görə evlərinə dönürlər. Onların bayramdan sonra Rusiyada durumun düzələcəyinə ümidləri var. “Lakin bu ümidlərin doğrulacağı inandırıcı deyil. Çünki Rusiyada müharibə əhval-ruhiyyəsi mövcuddur. Üstəlik, bu gedişin tez bir zamanda qarşısının alınması mümkünsüzdür”