SOCAR və “Tekfen” şirkətinin birgə işlədiyi yeni olimpiya mərkəzində çalışan işçilər namaz qıldıqları üçün işdən çıxarılıb. Islamazeri.az saytının məlumatına görə, onların sayı 15 nəfərdir. Digər gündəlik dini ibadətlərini yerinə yetirənləri də eyni aqibət gözlədiyi açıqlanıb. 

Belə ki, martın 18-də günorta namazının camaat halında qılınmasından sonra SOCAR-ın yüksək vəzifəli işçiləri 15 nəfərin iş kartını əlindən alıb və işdən çıxarılmalarını bildirib. Məlumata görə, bu hadisə namazdan dərhal sonra baş verib.

Baş verənlərlə bağlı Islam Həmdəmov və Elşən Məmmədov adlı işçilər Islamazeri.az saytına açıqlama verərək faktı təsdiqləyiblər. Olayla bağlı “Tekfen” şirkətinin türkiyəli əməkdaşı Hüseyn adlı şəxs (hansı vəzifə daşıdığını açıqlamaqdan imtina edib) isə FaktXeber.com-a açıqlama verərək kiminsə namaz qıldığına görə işdən çıxarılmasının düzgün olmadığını söyləyib: “Məgər insanları namaz qıldıqlarına görə işdənmi çıxarmaq olar” Biz heç kəsi namaza görə işdən uzaqlaşdırmamışıq. Yayılan məlumatlar həqiqəti əks etdirmir”.