Vyanadakı “rüşvət məhkəməsi” baş bankirin karyerasını təhlükə altına atıb

Hakimiyyətin onu Cahangir Hacıyevlə  dəyişmək planı var

Mərkəzi Bankın sədri Elman Rüstəmovun tutduğu vəzifədən azad edilməsi gündəmə gəlib. Iqtidar mətbəxində “Azadlıq”a sızan məlumata görə, məsələnin kökündə Elman Rüstəmovun adı da hallandığı Vyanada keçirilən “rüşvət məhkəməsi” dayanır.

Söhbət Avstriyanın Mərkəzi Bankının törəmə müəssisəsi, banknot çap edən “OeBS” şirkətinin rəhbərliyinin işi üzrə keçirilən məhkəmə prosesindən gedir.

Cinayət işinin materiallarına əsasən 2005-2011-ci illərdə “OeBS” şirkəti ilə Azərbaycan Mərkəzi Bankı arasında milli valyutanın-manatın çapına dair bağlanmış müqavilələrdən Mərkəzi Bankın rəsmilərinə 20 faiz həcmində “şapka” ödənilib. Rüşvət pulları Panamada qeydiyyatdan keçmiş offşor şirkətin hesablarına köçürülüb. Bir neçə prosesdə Azərbaycanla məsələ xüsusilə diqqətdə olub.  

Qeyd edək ki, Avropanın nüfuzlu nəşrləri mütəmadi olaraq yazılar dərc edir. Azərbaycan hakimiyyəti də prosesi ciddi şəkildə izləyir. Redaksiyamıza sızan məlumatda bildirilir ki, iqtidar “Vyana prosesi”nin gedişatından asılı olaraq  Elman Rüstəmovun tutduğu vəzifədən uzaqlaşdıra bilər. Əgər “rüşvət məhkəməsi” Azərbaycan hakimiyyəti üçün daha dramatik fazaya keçərsə qədəm qoyarsa, baş bankir Beynəlxalq Bankın rəhbəri Cahangir Hacıyevlə əvəzlənəcək.