Çin və Avstraliya gəmiləri təyyarənin qara qutusundan olduğu ehtimal edilən siqnal əldə edib

Malayziyaya məxsus itmiş sərnişin təyyarəsinin axtarış əməliyyatının imkanları getdikcə daralır. 

ANS PRESS-in məlumatına görə, ötən gün Çin hərbi gəmisinin əldə etdiyi siqnalın təyyarənin qara qutusuna aid olması ehtimalı üzərində aparılan işlər sabahdan etibarən nəticəsiz qala bilər. Təyyarələrin qara qutusu 30 gün ərzində siqnal yaymaq xüsusiyyətinə malik olur. Martın 8-ində radarlardan itən təyyarənin yerini müəyyən etmək son bir sutka ərzində də mümkün olmazsa, daha sonra axtarışların müsbət nəticə verəcəyi gözlənilmir. 

Çindən sonra, Avstraliyaya məxsus hərbi gəmi də Hind okeanının cənubunda qara qutulardan gəldiyi ehtimal edilən siqnal əldə etdiyini açıqlayıb. Həmin siqnalın 2 saat ərzində 2 dəfə əldə edildiyi bildirilir. Avstraliyalı mütəxəssislər bunun indiyədək əməliyyat zamanı “ən ümidverici ipucu” olduğunu bildirirlər. 

Hazırda axtarış əməliyyatları Avstraliyanın Pert şəhərindən idarə olunur və təxminən 217 min kvadrat kilometri əhatə edir. Əməliyyata bir neçə ölkədən 13 təyyarə və 11 hərbi gəmi qoşulub. 

Xatırladaq ki, Malayziyanın paytaxtı Kuala-Lumpurdan Çinin paytaxtı Pekinə uçarkən radarlardan itən “Boeing-777” tipli təyyarənin göyərtəsində 227 sərnişin və 12 ekipaj üzvü olub.