Qərbin sanksiyaları Azərbaycan vətəndaşlarının güzəranına təsirsiz ötüşməyəcək

Avropa Ittifaqına üzv dövlətlərin, eləcə də bir sıra başqa ölkələrin Krımın işğalı ilə əlaqədar Rusiyaya qarşı tətbiq etdiyi sanksiyalar hələlik Azərbaycan iqtisadiyyatına ciddi təsir edə bilməz. “Trend”in məlumatına görə, bunu Asiya Inkişaf Bankının (AIB) baş iqtisadçısı Devid Oldfild Bakıda keçirilən “Asian Development Outlook-2014” hesabatının müzakirəsi zamanı deyib.

Onun sözlərinə görə, bu sanksiyalardan daha çox əmtəə dövriyyəsi və əmək bazarı Rusiya ilə güclü olan ölkələr -Qazaxıstan, Qırğızıstan, Tacikistan əziyyət çəkə bilər.

Asiya Inkişaf Bankının Azərbaycandakı nümayəndəliyinin iqtisadçısı Nailə Vəliyeva deyib ki, sanksiyaların güclənməsi neftin qiymətinin azalmasına səbəb ola bilər: “Rusiyada iqtisadi vəziyyətin pisləşməsi orada işləyən azərbaycanlıların gəlirlərinə də təsir edəcək. Bu da Rusiyadan pul köçürmələrinin həcmini azalda və ölkənin tədiyyə balansına təsir göstərə bilər”.

 

Iqtisadçı-ekspert Qubad Ibadoğlu bu sanksiyaların tətbiqinin müsbət və mənfi tərəflərini təhlil edərək, müxtəlif spektrli dəyişikliklərin olacağını istisna etmir. Dünya bazarında neftin qiymətində ucuzlaşmaya doğru dəyişiklik baş verərsə, bu, neftdən gələn gəlirlərin azalmasına və Azərbaycanın maliyyə imkanlarının zəifləməsinə gətirib çıxara bilər: “Rusiyada böhrandan qaynaqlanan işsizlik və eyni zamanda,  büdcə böhranı, valyutanın dəyərdən düşməsi, hesablaşmalardakı gərginlik son nəticədə orada biznes fəaliyyətində çalışan və dövlət orqanlarında işləyən azərbaycanlıların vəziyyətinin pisləşməsinə gətirib çıxara bilər”.

Ekspertin sözlərinə görə, Rusiyanın valyuta bazarında baş verən dəyişikliklərin ixrac-idxal məsələlərinə də təsiri qaçılmazdır: “Azərbaycanın əsas tərəfdaşı Rusiya olmaqla, onun iqtisadiyyatında baş verən dəyişikliklər Azərbaycan iqtisadiyyatına da təsirsiz ötüşməyəcək”. (azadliq.info)