Rafil Hüseynov Yardımlı yolunu genişləndirmək adı altında dağıtdığı obyektlərin yerini satışa çıxarıb 

Masallıda sahibkarların bir çoxu müflis olmaq həddinə çatıb. Buna səbəb icra başçısının yeri gəldi-gəlmədi onlara problemlər yaratmasıdır. JAM.AZ-a verilən məlumata görə, sonuncu belə problem isə bu yaxınlarda baş verib. 

Sahibkarların bildirdiyinə görə, Masallı-Yardımlı yolunu genişləndirmək adı altında yolun Ərkivan qəsəbəsindən keçən hissəsi boyu bütün yolqırağı dükanların hamısı sökdürüldü. Həmin vaxt iş adamlarına bildiriblər ki, guya, yol genişləndiriləcək. Bu zaman orada dükanları, sexləri və digər ticarət və iaşə məqsədli obyektləri olan şəxslərə isə kompensasiya verilməyib. Tələb edənləri də həbslə qorxudublar. 

JAM.AZ-a daxil olan məlumata görə, dükanlar tam söküldükdən sonra məlum olub ki, bütün bunların hamısı bəhanədir. Məqsəd yol qırağındakı yerləri yenidən satışa çıxarıb pul qazanmaqdır. Bunu təsdiq edən əsas fakt ondan ibarətdir ki, boş qalmış həmin ərazilərdə yeni dükanların tikilməsi elə əvvəlki sahibkarlara təklif olunub. Və onlara bildirilib ki, əgər belə bir niyyətləri varsa, hər biri 5-10 min manat civarında Masallı İcra Hakimiyyətinə pul gətirməlidir. 

Məlumatda o da deyilir ki, icra başçısı Rafil Hüseynov bu işdə İcra Hakimiyyətinin işçisi Abbas adlı şəxsi qabağa verib. Qeyd olunur ki, həmin rəsmi sahibkarlarla danışıqlar apararaq, onları razı salmağa çalışır. 

Bu əsnada JAM.AZ-a daxil olan məlumatda deyilir ki, Rafil Hüseynovun göstərişinə əsasən söküntü aparılmış yerə bir neçə çörək kiosku gətirilib. Dəmirdən hazırlanmış həmin kiosklarda isə icra başçısının nəzarəti altında olan Öncəqala Çörək Zavodunun çörəkləri satılacaq. Vaxtıyla həmin ərazidə dükanları olanlar isə nə edəcəklərini bilmirlər.