Nemtsov: “İmperialist hisslərin bədəlini rus xalqı artıqlaması ilə ödəməli olacaq”

Rusiyanın tanınmış müxalif siyasətçisi Boris Nemtsov bəyan edib ki, Donetskin Slavyansk rayonunda separatçıların hərəkətə keçməsi Putinin Ukraynanın materik hissəsində müharibəyə başladığını göstərir.

Onun fikrincə, Putin sanksiyalara və Rusiyanı təhlükəyə atan iqtisadi böhrana baxmayaraq, “va-banka” getməkdədir.

“Tanınma nişanları olmayan hərbi geyimli şəxslərin Slavtanskda peyda olması və güc orqanlarının binalarını zəbt etməsi bir şeydən xəbər verir – Putin va-banka getmək qərarı verib və Ukraynanın materik hissəsində müharibəyə başlayıb. Onu artıq “Qazprom”a və neft kompaniyalarına qarşı sanksiyalar dayandıra bilməz. O, ölkəni iqtisadi böhrana və çətinliklərə məhkum edəcək”, – deyə Nemtsov Facebook səhifəsində yazıb.

 

Nemtsovun fikrincə, Rusiyanı bahalaşma, yoxsulluq və işsizlik gözləyir. “İmperialist hisslərin bədəlini rus xalqı artıqlaması ilə ödəməli olacaq”, – deyə o, əlavə edib.

(azadliq.info)