Qarabağ ermənisini azərbaycanlı saymaq olarmı?

Virtualaz.org-un xəbərinə görə, “Media forum” saytının sualını cavablandıran Milli Məclisin Mədəniyyət komitəsinin sədri, dilçi və türkoloq Nizami Cəfərov deyib ki, bu, azərbaycanlı sözünün hansı mənada işlənməsindən asılıdır: “Türk azərbaycanlılardan söhbət gedirsə, erməniləri bura aid eləmək olmaz. Azərbaycanlı sözü Azərbaycan Respublikasının vətəndaşı mənasında işlənəndə isə Dağlıq Qarabağda yaşayan erməniləri də azərbaycanlı saymaq olar. Etnos kimi deyil, vətəndaş kimi. Bu mənada bizim ölkədəki ermənilər də, ruslar da, gürcülər də azərbaycanlıdır.
Termin olaraq azərbaycanlı anlayışı çoxmənalıdır. Məsələn, rus bir mənanı bildirir, rusiyalı isə bir başqa mənanı. Bizdə azərbaycanlı ifadəsinin vətəndaşlıq çaları da var və bu baxımdan etnik mənsubiyyətindən asılı olmayaraq Azərbaycan Respublikasının bütün vətəndaşları azərbaycanlıdır”.
Politoloq Elxan Mehdiyev sualı belə cavablandırıb: “Hüquqi baxımdan Azərbaycan Respublikası ərazisində yaşayan bütün erməniləri də azərbaycanlı saymaq mümkündür. Amma Azərbaycanda yaşayan qeyri-türklərə, o cümlədən ermənilərə azərbaycanlı demək ənənəsi güclü deyil, bu xalqlar hər vaxt öz adları ilə tanınıblar: erməni, rus, gürcü, yəhudi… Müsəlman dininə mənsub milli azlıqlar da çox zaman etnik mənsubiyyəti ilə gedir – ləzgilər də, kürdlər də, talışlar da”.
Tarixçi alim Fazilə Əliyeva isə düşünür ki, ermənini heç bir halda azərbaycanlı saymaq olmaz: “Onlar bu torpağın köklü sakinləri deyil, gəlmədirlər. Bizim torpaqlara köçüb yaşayıblar, sonra da torpaqlarımızı zəbt ediblər, bizə qarşı soyqırımı törədiblər. Erməni ermənidir və Qarabağ ermənisi də heç vaxt azərbaycanlı adlandırıla bilməz”.