Ziya Məmmədovun "vurulması"na qərar verildi

Nazirin əsas biznes şərki “Hafka” ləqəbli Hafiz Məmmədov da ona qarşı çıxdı

Nəqliyyat  naziri  Ziya Məmmədovun  zəiflədilməsi yönündə iş gedir.

Bu haqda Avropa.info-nu  məlumatlandıran mənbənin sözlərnə görə, nazirin  əsas maliyyə qaynaqlarından sayılan paytaxtda sərnişin daşınmasının təşkili funksiyasının  Bakı şəhər İcra Hakimiyyətinə verilməsi ilə başlanan proses davam etdiriləcək.

Nazirlər Kabinetinin 14 aprel 2014-cü il qərarını xatırladan mənbə bildirir ki, həmin qərara kimi,  Paytaxtda sərnişin daşınması nəqliyyat naziri Ziya Məmmədova məxsus “Transqeyt” şirkətinin monopoliyasında  olub. Bununla da Ziya Məmmədovun  çox önəmli  maliyyə qaynaqlarından biri əlindən alınıb. Bundan başqa, bir müddət öncə,  Bakı yollarının təmir-bərpası funksiyası da Nəqliyyat Nazirliyindən alınıb Bakı Şəhər İcra Hakimiyyətinə verilmişdi.

Mənbənin dediyinə görə, əslində, Ziya Məmmədovun  çökdürülməsinə hesablanan bu addımların davam etdiriləcəyi gözlənilir. “Artıq  Ziya Məmmədovun biznes ortağı  “Hafka” ləqəbli  Hafiz Məmmədovla da aralarında olan narazılıq pik həddə çatıb.  Hafiz  Məmmədov   uzun müddətdir ki, Ziya Məmmədovla  biznes tərəfdaşlığına son vermək istəyir. Artıq bir çox sahələrdə onların biznes şərikliyinə son qoyulub. Bir müddət öncə, iflasa uğrayan, Ziya Məmmədova məxsus  “Bank of Azərbaycan” bankında onların  biznes şərikliyinə son verildi. Belə ki, Hafiz Məmmədov  dövr edən pullarını , bankdan çıxarmaqla “Bank of Azərbaycan”ın  iflasına səbəbkar oldu. “Transqeyt” şirkətində də, təsisçi Hafiz Məmmədov olsa da, icraçı direktor Ziya Məmmədovun oğlu Anar Məmmədov idi. Nazirlər Kabinetinin son qərarı ilə  bu şirkətin də artıq iflasa uğradığını demək olar.”

Mənbə bildirir ki, Ziya Məmmədovla Hafiz Məmmədov arasında  narazılıqlardan biri də “Hafka”nın prezident olduğu  “Bakı” futbol klubunda  nazirin oğlu Anar Məmmədovun fəxri prezident olmasıdır. Nazir oğlunun mütəmadi olaraq  klubun işlərinə  müdaxilə etdiyini deyən mənbənin sözlərinə görə,  futboldan kifayət qədər başı çıxan Hafiz Məmmədov bunu xoşlamır. ” Ziya Məmmədovun  “vurulacağı” təqdirdə  Hafiz Məmmədovun  nazirlə  bütün biznes  ilişgilərinə son verəcəyi gözləniləndir.”

Mənbə  qeyd edir ki, son dövürlər mətbuatda  Ziya  Məmmədovun  yaxın qohumlarının  bahalı avtomobillərlə, olduqca dəbdəbəli həyat şəraiti  ilə gündəmə gəlmələri  nazirin mövqelərini xeyli dərəcədə zəiflədib. “Hakimiyyətin yuxarı pillələrində  prezident  İlham Əliyevin   “qudurğan məmur balaları”na barmaq silkələməsinə baxmayaraq , məsələn, Ziya Məmmədovun qardaşı deputat Elton Məmmədovun oğlu  Aynar Məmmədovun  bahalı  avtomobillərlə  ötüş yarışına çıxmasını  qəzəblə qarşılayırlar. Bundan başqa Ziya Məmmədovun  nəqliyyat sektorundakı fəaliyyəti də qənaetbəxş sayılmır. Bütün bu amillər nazirin  süqutunu şərtləndirən amillərdəndir.”

Nəqliyyat nazirinin  biznesinə artıq əl qoyulduğunu deyən mənbənin sözlərinə görə, onun yaxın qohumlarının  da  “vurulacağı”  gözlənilir. Onun  bildirdiyinə görə, nazirin  kurasiyasında olan və  icra başçıları da, onun yaxın qohumlarından ibarət olan, bir  neşə rayonun icra başçısının işdən çıxarılacağı gözlənilir. “Ziya Məmmədovun kurasiyasında olan bir neçə deputatın da , 2015-ci ildə keçiriləcək parlament seçkilərində  deputat mandatından məhrum ediləcəkləri  ehtimal olunur. Bundan başqa ilk öncə, fəaliyyətindən onsuz da ciddi narazılıqlar olan, Ziya Məmmədovun əmisi oğlu Mənsur Məmmədovun da işdən azad ediləcəyi gözlənilir.”

Ziya Məmmədov üçün karyerasının ən kritik dövrü  olduğunu bildirən mənbənin sözlərinə görə, nazirin biznesinə əl qoyulması, onun vəzifəsini itirməsi ilə də nəticələnə bilər. “Hər  zaman məmur oliqarxlar  işdən azad olunmazdan öncə, onların biznes sahələrinə əl qoyulur  və  bu yolla onlar zərəsizləşdirilirlər. Mümkündür ki, Ziya Məmmədov da , zəiflədildikdən sonra, sakitcə yola salınsın, ya da  səlahiyyətsiz nazir qismində fəaliyyətini davam etdirsin”.