Eldar Əzizovun Sumqayıtın nəqliyyat həyatına gətirdiyi əcaib yenilik

İcra başçısına məxsus marşurutlar hərəkət qrafikinə niyə məhəl qoymur?

Sumqayıt Şəhər İcra Hakimiyyətinin başçısı Eldar Əzizov bugünlərdə şəhərin nəqliyyat həyatına daha bir yenilik gətirib. Bu barədə Moderator.az-ı məlumatlandıran mənbənin sözlərinə görə, son vaxtlar şəhər nəqliyyatının önəmli bir qismini ələ keçirən icra başçısı, sahibi olduğu marşurutlara qeyri-məhdud səlahiyyətlər verib. Belə ki, icra başçısına məxsus avtobuslar gün ərzində daha çox müştəri yığmaq üçün hərəkət qrafikini kobud şəkildə pozur, qrafikdə göstərilməyinə baxmayaraq bəzi “sərf etməyən” ərazilərə daxil olmur, bununla da vətəndaşları faktiki olaraq nəqliyyatsız qoyur. İcra başçısına bağlı olan avtobus sürücüləri şəhər sakinlərinin ittihamları qarşısında iddia edir ki, girmədikləri küçə və məhəllələr xırda, manevr imkanı daha geniş olan “Mersedes” markalı nəqliyyat vasitələri üçündür. Sürücülər iddia edir ki, onlara nisbətən dar, çoxlu döncələri olan küçələrdən keçməmək tapşırığı verilib və əgər vətəndaşlar nəqliyyat qıtlığından əziyyət çəkirsə, o zaman əlaqədar qurumlardan öz məhəllələri üçün yeni xətt və marşurutlar tələb edə bilər.

Məlumat üçün qeyd edək ki, E.Əzizov Sumqayıtda bir neçə xətt və avtobusun, o cümlədən həm hərəkət qrafiki, həm də avtobusların sayına görə şəhərin ən böyük xətti sayılan 7 saylı marşurutun himayədarı hesab olunur.