2 ilə 30 milyard manat xərclənəcək 

Azərbaycan hökuməti neftdən əldə edilən pulları göyə sovurmaqda davam edir. Son illər əldə edilən neft gəlirlərini sosial layihələrə və xidmət sektoruna xərcləyən, habelə gələcəyi olmayan işlərə sərf edən hökumət yaxın 2 il üçün də planlarını qurub.

Məlumatlara görə, qarşıdakı iki ildə hökumət bir sıra layihələri həyata keçirmək üçün 30 milyardan artıq pul xərcləməyi hədəfləyib. Onun 6 milyard manatı Bakı şəhərinin kanalizasiya sisteminin yenilənməsinə sərf olunacaq. Kənddaxili yollar, infrastrukturun qurulması və digər bu kimi işləri həyata keçirmək üçün isə 10 milyard manat ayrılacaq. 

Həmin planda Zirə kəndinin ətrafında göydələnlərin ucaldılması da var. Bunun üçün isə 5 milyard manat nəzərdə tutulub. 6 milyard dolları isə digər layihələrin icrasına yönəldəcəklər. 

İndiyə qədər həyata keçirilmiş layihələrdən aydın şəkildə görünür ki, hökumətin hədəfi heç də qeyd olunan işləri görmək yox, həm də neftin pullarını mənimsəməkdir. Çünki bəzi layihələrdə şişirdilmiş qiymətlər çoxdan məlumdur. Bir körpünün 300 milyon manata başa gəlməsi, bunun bariz nümunələrindən biridir. 

Bu plandan isə belə başa düşülür ki, əsas hədəf heç də qeyd olunan işlərin görülməsi yox, neftin pullarını silməkdən ibarətdir. Və bu gələcək nəsillər üçün saxlanılmalı olan pulların havaya sovrulması və dağıdılması anlamındadır. (jam.az)