İşdən çıxarılan bələdçi rəisin qəbulunda öldü

İşdən çıxarılan qatar bələdçisi Həşim Rəsulov mayın 8-da Bakı vaqon
deposu rəisinin qəbulunda dünyasını dəyişib. Bu barədə azadliq.info-ya
qatar bələdçiləri məlumat verib. Onların sözlərinə görə, işdən çıxarılan
“Azərbaycan Dəmir Yolları” QSC-nin bələdçiləri mayın 8-də Prezident
Administrasiyası önündə aksiya keçiriblər. Onlara PA-dan  əvvəlki kimi
vəd veriblər. Bundan sonra bələdçiləri Həmkarlar İttifaqının qarşısına
gediblər.
30 ildən çoxdur qatar bələdçisi işləyən Həşim Rəsulov
həmkarlarıyla sonuncu ünvana – Həmkarlar İttifaqına getməyib. O,
birbaşa  Bakı vaqon deposunun rəisi Rəhman Əbişovun qəbuluna yollanıb.
“Həşim
Rəsulov bizdən ayrılanda özünün narahat olduğunu dedi. Söylədi ki,
Rəhman Əbişovun qəbuluna gedir, qanunsuz işdən çıxarılmayla bağlı onunla
görüşmək istəyir. İndi bizə dedilər ki, Həşim Rəsulovu qəbul zamanı
əsəbləşdiriblər. Halı pisləşib, elə idarədə dünyasını dəyişib”, – deyə
bələdçilər bildirirlər.