“Onun başı biznesinə qarışıb, bizimlə görüşmək istəmir”

60 saylı Salyan-Neftçala seçki dairəsindən deputat seçilmiş Fəzail Ağamalı ilə bağlı ilginc ittihamlar irəli sürülüb. Bu ittihamı irəli sürənlər isə məhz həmin dairənin seçiciləridir. 

JAM.AZ-a daxil olan məlumatlarda deyilir ki, seçicilər Fəzail Ağamalını sonuncu dəfə nə zaman gördüklərini xatırlamırlar. Onlar deyirlər ki, deputatı seçicilər seçsələr də, Fəzail Ağamalı həmişə onların səsinə hörmətsizlik edib. “Belə millət vəkili olar? Biz onu tapa bilmirik. Nə rayona gəlir, nə də bizimlə görüşür. Problem ondadır ki, Bakıya onunla görüşə gedənləri də qəbul etmir. Deyir ki, köməkçisi ilə görüşək. Həm də qəbul etdiyi adamlara qarşı kobudluq da edir. Fəzail Ağamalı anlamılıdır ki, bizim qarşımızda oturub, bizi dinləməlidir”.

Həmin məlumatda Fəzail Ağamalıya qarşı bir sıra ittihamlar da səslənib. “Ölkənin bütün çınqıl zavodları onundur. Salyanda, Yevlaxda, ayrı-ayrı rayonlarda onlarla obyekti, restoranları, zavodları var. Beyləqanda heyvandarlıq fermaralır mövcuddur. Təbii ki, bu qədər sərvəti və imkanı olan şəxsin bizimlə görüşməyə vaxtı olmaz. Olan vaxtını da elə həmin işlərin görülməsinə sərf edər”.