Göyçay bazarında gərginlik davam edir

Satıcılar qalmaqda, icra strukturları onları köçürməkdə israrlıdır

Onların müdafiəçisi Taleh Xasməmmədova problemlər yaradılır

“Bazarın dörd bir yanında polis postu qurulub. Alıcıların
giriş-çıxışına problem yaradılır” – bunu “Azadlıq”a Göyçay rayonun
mərkəzində yerləşən, 300 nəfərin işlədiyi Ticarət Mərkəzinin satıcıları
deyiblər. Sahibkarların sözlərinə görə, bazarı Nəqliyyat nazirinin
xalası oğlu, rayonun icra başçısı Mənsur Məmmədovun tapşırığıyla
sökürlər.

“Məqsəd satıcıları rayonun Cəyirli kəndində tikilən bazara
yönləndirməkdir. Biz isə bununla razı deyilik. Heç kim rayonun
mərkəzindən 4-5 kilometr yolu qət edib Cəyirli bazarına getməyəcək.
Bundan başqa, yeni bazarda yer haqları bahadı, dükan və piştaxtalarda
alver etmək üçün almalısan. Biz razı deyilik. Maşınları bazara
buraxmırlar. Məcbur qalırıq ki, məhsullarımızı əlimizlə daşıyıb bazara
gətirək. Insanları bu bazardan uzaq tutmağa çalışırlar. Bizim üçün bura
rahatdır, rayonun mərkəzidir. Illərdir ki, buradan alver edirik”, – deyə
ticarətçilər etiraz edirlər.

Sahibkarlar onu da bildirdilər ki, Cəyirli bazarında yer götürən
satıcıların bir çox qonşu rayonlara üz tutublar: “Çünki orada alver
getmir. Məhsulları satılmadığından mallar xarab olur. Əvvəllər
deyirdilər ki, kim bazarda işləmək istəməsə, pulu qaytarılacaq. Indi isə
aldanan satıcılara ödədikləri məbləğlər geri qaytarılmır”. Satıcıların
hüquqlarını qoruyan hüquq müdafiəçisi Taleh Xasməmmədova da problemlər
yaradılır. O bir neçə dəfə xəbərdarlıq mesajı alıb. Ancaq buna
baxmayaraq hüquq müdafiəçisi öz işini həyata keçirir.

Qeyd edək ki, Göyçayın icra başçısı Mənsur Məmmədov nəqliyyat naziri
Ziya Məmmədovun xalası oğludur. Rayonun da  Ziya Məmmədovun
kurasiyasında olduğu iddia edilir.

Ramin DEKO

Short URL: http://www.cumhuriyyet.net/?p=7272