Beyləqanın ali təhsilsiz “meri”nin restoranında xoşagəlməz halların yaşandığı deyilir 

Ötən gün məlumat vermişdik ki, Beyləqan şəhər İcra Nümayəndəliyinin rəhbəri Azil Aslanov ali təhsili olmadan bu posta sahib çıxıb. JAM.AZ-a verilən məlumatlarda iddia olunurdu ki, şəhər “meri” Gəncə Texnologiya İnstitutundan diplomu itdiyi üçün “arayış” almaqla icra başçısı Vaqif Abdullayevin qılığına girib.

Məlumatlarda o da vurğulanırdı ki, Azil Aslanovu iş başından daha çox, “Qamışlıq” deyilən ərazidə tapmaq olur. Qazandıqlarını eyş-işrətə xərcləməkdən çəkinməyən Beyləqanın “meri” bunun üçün hətta “Kral” adlı restoran da açıb. JAM.AZ-a çatan məlumata görə, sözügedən şəxsin “Kral”ı rayonda yaxşıca ad çıxarıb. Sadəcə, maraqlı məqamlardan biri odur ki, həmin restoranda tez-tez rayonun molla və axundları gözə dəyir. Və ən pis hallardan biri odur ki, “Kral” restoranında bir çox hallarda heç də xoşagəlməz vəziyyətlər yaşanır. Xüsusən də qadınlarla yaşanan insidentlərin hay-küyə səbəb olması halları çoxlarına məlumdur. 

Azil Aslanovu “Qamışlıq” və “Kral”a çəkib gətirən əsas səbəblərdən biri də icra başçısının onu işlətməsi deyilir. Hətta o, bir neçə dəfə bundan şikayətçi düşərək eyş-işrət məclislərindən birində deyib ki, Vaqif Abdullayev Beyləqandan getsəydi, daş daşımaqdan canları qurtaradı.