Bakıda məcburi köçkünlərlə polis arasında qarşıdurma

Bu dəqiqələrdə Binəqədi rayonu, 7-ci mikrorayon, 3126/27-ci məhəllədə yaşayan qaçqınların evlərinin söküntüsünə başlanılıb.

Virtualaz.org saytının hadisə yerində olan əməkdaşı xəbər verir ki, əraziyə 100 nəfərdən çox polis gətirilib. Ərazi ağır texnika, təcili tibbi yardım, polis və yanğınsöndürən maşınlarla əhatəyə alınıb: “Bakı Metropoliteninin rəhbərliyi, Binəqədi Rayon İcra Hakimiyyətinin nümayəndələri də buradadırlar. Lakin jurnalistlər əraziyə buraxılmır. Yalnız Metropolitenin özü ilə gətirdiyi jurnalistlərin çəkiliş aparmasına icazə verilib. Onlar isə hadisə baş verən ərazini deyil, söküntünü işıqlandırırlar”.

Ərazidə yaşayan məcburi köçkünlərdən birinin vəziyyəti pisləşib. Metropoliten rəhbərliyi köçkünləri çıxmayacaqları təqdirdə evlərinin başlarına uçurulacağı, kişiləri isə həbs olunacaqları ilə hədələyirlər.

Qeyd edək ki, məcburi köçkünlərin zorla köçürülməsini Qaçqın və Məcburi Köçkünlərlə İş üzrə Dövlət Komitəsinin əməkdaşları kənardan seyr edirlər.

Artıq saxlanılanların olduğu da bildirilir.