Yasamal sakinləri aksiya keçirdilər

Bu gün bir qrup Yasamal rayon sakini etiraz aksiyası keçiriblər. Onların etirazlarına səbəb binanın qarşısında yeni parkın tikintisi ilə əlaqədar binada aparılan abadlıq işləridir. Bu haqda məlumatı musavat.com-a sakinlər özləri veriblər. 

Yasamal rayonu, Zahid Xəlilov 66 ünvanında yaşayan sakinləri bildirirlər ki, bina dövlət balansına salınmayıb. Dəfələrlə müraciət etmələrinə baxmayaraq binaya illərdir lift qoyulmur. Əvəzində binanın fasadı rənglənir. Sakinlər də rənglənmədən öncə binanın vacib problemlərinin həllini tələb edirlər. 

Sakinlər deyirlər ki: “Şikayət etmədiyimiz yer qalmayıb. Bu, bizim ilk aksiyamız deyil. Binamızın qarşısında yeni park tikilir. Bu, çox yaxşıdır. Amma bizim binamızın problemləri həll edilmir. İndi də binanın fasadını rəngləmək istəyirlər. Çünki prezident yaxınlıqdan keçəcək. Bina səliqəli görünsün. Binanı yalandan bəzəməklə deyil. Liftimiz yoxdur buna bir yardım etsinlər. Dəfələrlə müraciət etməyimizə baxmayaraq binaya illərdir lift qoyulmur. Bina dövlətin balansına alınmayıb. Biz bunlara etiraz edirik”.

Etiraz zamanı polislə sakinlər arasında xırda gərginlik də yaşanıb.  Əraziyə xeyli sayda polis əməkdaşı cəlb olunub. Ehtimal olunur ki, onlar baş verə biləcək hər hansısa qarşıdurmanı önləmək üçün əraziyə cəlb olunublar.