Oqtay Əsədov ikili oyunda

Azərbaycan parlamentinin spikeri Oqtay Əsədov Ukraynanın yeni
seçilmiş prezidenti Pyotr Poroşenkonun iyunun 7-də keçiriləcək
inaqurasiya mərasimində iştirak edəcək.

Məlumatda deyilir ki, Ukrayna tərəfi inaqurasiya
mərasimində iştirak üçün prezident İlham Əliyevə dəvət göndərib. Lakin
rəsmi Bakı artıq Kiyevi mərasimdə Azərbaycanı spiker Oqtay Əsədovun
təmsil edəcəyi barədə məlumatlandırıb. Poroşenkonun inaqurasiya
mərasimində bir sıra Qərb ölkələrinin liderlərinin qatılacağı artıq
təsdiqlənib. Keçmiş sovet respublikalarından Moldova prezidenti Nikolay
Timofti, Estoniya prezidenti Tomas İlves, Latviya prezidenti Andris
Berzniş və Litva prezidenti Dalya Qribauskayte da mərasimdə iştirak
edəcəklər. Gürcüstanı da mərasimdə prezident Georgi Marqvelaşvili təmsil
edəcək.

Azərbaycan parlamentinin spikerinin Ukraynanın yeni prezidentinin
andiçmə mərasimi onun Moskva səfəri zamanı yaşanmış kazusdan sonraya
təsadüf edəcək. Xəbər verildiyi kimi Rusiya rəsmi KİV-ləri Oqtay
Əsədovun Dövlət Dumasının spikeri Sergey Narışkinlə görüşünə dair
yaydıqları xəbərlərdə O.Əsədovun adından Azərbaycanın ATƏT PA və AŞ
PA-da Rusiyanın Ukraynaya dair mövqeyini dəstəkləyəcəyinə dair bəyanat
yayıblar. Rəsmi Bakının Ukrayna böhranı ilə bağlı mövqeyinə zidd olan bu
bəyanat dərhal geniş rezonansa səbəb olub. Milli Məclisin mətbuat
xidməti Virtualaz.org-un redaksiyası ilə əlaqə saxlayıb və Azərbaycanın
Ukrayna məsələsində Rusiyaya dəstək vəd etməsi barədə İTAR-TASS-ın
yaydığı xəbəri qəti şəkildə təkzib edib, bu xəbəri Bakı ilə Kiyev
arasında nifaq salmağa yönələn addım adlandırıb.