Habil Əliyevdən şad xəbər

07.06.2014 - 23:26

Kaman ustası xəstəxanada yatmaqdan imtina edib

Müalicəsini evdə davam etdirən Habil Əliyev xəstəxanada
yatmaqdan imtina edib. Kaman ustasının həyat yoldaşı ANS-ə bildirib ki,
bütün ümidlərini möcüzəyə bağlayıblar.
Habil Əliyev
Xalq Artisti, “Şöhrət” və “İstiqlal” ordenlərinin sahibidir. Amma bütün
bu rəsmi titullardan əlavə də o, Azərbaycanda bir nömrəli kamança
ustasıdır. Bu o vaxt da belə olub, bu gün də belədir. Hərdən adama elə
gəlir ki, o, öz işinin kamil ustası olmasaydı, bədxah qonşularımız
kamanı da çoxdan əlimizdən almışdılar. İndi isə ölüm onu bizdən almaq
istəyir.
Hazırda müalicəsini evdə davam etdirən
Habil Əliyev xəstəxanada yatmaqdan imtina edib. Bunu darıxması ilə
əsaslandırıb. Allah şəfa versin Habil müəllimə! Onun yoxluğu da bizi
təkcə kaman üçün yox, elə kamanı inlədən o barmaqlar üçün də
darıxdırardı.
Habil Əliyev “darıxıram, arvadla
bütün söhbətləri eləyib qurtarmışıq. Onunla da dalaşırıq”, – deyə
bildirib. Kaman ustası bildirib ki, sənəti, mədəniyyət adı ilə təmsil
edənlər hamısı gedib: “İndi bizim əlimizə düşüb, alçaldanlar”.
Habil
Əliyevlə dəyərlərimiz haqqında bu söhbəti ötən ilin qışında edib.
Söhbətə məmnuniyyətlə razılaşmışdı. Baxmayaraq ki, onda da səhhəti yaxşı
deyildi. Bu gün isə onun səhhəti ümumiyyətlə yaxşı deyil və sənətkar
hətta danışığını belə itirib. O, ağciyər pnevmaniyası və
ürəkçatışmazlığından əziyyət çəkir.
Həyat yoldaşı
Şərqiyyə xanımın sözlərinə görə, bu gün səhər saatlarına qədər hətta
H.Əliyevi itirə bilcəklərinin narahatlığını yaşayıblar. Amma indi
vəziyyəti nisbətən stabilləşib və sənətkar iynənin təsiri ilə yatır.
Onun yataq şəraitində çəkilib, efirə verilməsinin tərəfdarı olmadığını
əsas gətirən Şərqiyyə xanıma açığı, biz də dəstək verdik. Çünki Habil
Əliyevi həmişə gümrah, zarafatcıl, necə deyərlər yaşından çox-çox cavan,
enerjili görmüşük.
Möhkəm olun ustad. Cəmi üç ildən sonra 90 yaşınızı qeyd edəcəyik. Hara tələsirsiniz? Lütfən, kamanı ağlar qoymayın…