Eynulla Fətullayevin saytı məhkəməyə verilir
Sayt xalq artistinin ABŞ-da ermənilərdən mükafat aldığını yazmışdı
Xalq artisti Brilliant Dadaşova jurnalist Eynulla Fətullayevin
rəhbəri olduğu “haqqin.az” saytını məhkəmə ilə hədələyib. Modern.az-ın
məlumatına görə, müğənni “haqqin.az”da özü haqqında yazılan
informasiyanı təhqir hesab etdiyini deyərək, bu barədə məhkəməyə
müraciət edəcəyini vurğulayıb:
“Amerikada mükafat aldıqdan bir gün sonra – Amerika Nyu-York
Azərbaycan Qadınlar Cəmiyyətinin sədri Münəvvər xanımın rəhbərliyilə
keçirilən 28 may Respublika günümüz münasibətilə bayram tədbirində
iştirak etdim. Öz doğma vətənimdə isə nə qədər mənim adımla özünə
reytinq qazanıb reklam olunmasını istəməsəm də – adını çəkməyə məcbur
olduğum “haqqin.az” bizim uğurumuza dərin yara vurdu. Məni şər-böhtanla
təhqir etdiyinə görə məhkəmə qarşısında cavab verməli olacaqlar! Çox
şükürlər olsun ki, hüquqi, demokratik ölkədə yaşayırıq”.
Qeyd edək ki, xalq artisti Brilliant Dadaşova bir neçə gün öncə
ABŞ-da təşkil olunan bir tədbirdə “Big Apple Awards” musiqi mükafatı
alıb. Mükafatlandırma mərasimində sənətçiyə 30 min dollar pul və
“Mercedes” markalı avtomobil hədiyyə edilib.
Haqqın.az saytında xalq artistinə həmin mükafatı ermənilərin verdiyi
iddia edilib. Bunu sözügedən yarışmanın idarə heyətində üç nəfər
erməninin olması ilə əsaslandırıblar.
Short URL: http://www.cumhuriyyet.net/?p=8398
