Tayib Ərdoğanın Gülən hərəkatına Bakı hücumunun ikinci dalğası

Azərbaycan Respublikası Dövlət Neft
Şirkətinin (ARDNŞ) mətbuat xidmətindən APA-ya verilən məlumata görə,
ARDNŞ-in həmtəsisçi olduğu “Azərbaycan Beynəlxalq Təhsil Mərkəzi”
İctimai Birliyinin (ABTM) bu gün toplantısı keçirilib.

Toplantıda Azərbaycan Beynəlxalq Təhsil Kompleksinin (ABTK)
nəzdində fəaliyyət göstərən “Araz Kursları” MMC, onun təsisçisi olduğu
digər qurumların və ümumtəhsil məktəblərinin fəaliyyəti ilə bağlı
ABTM-də yaranmış əlavə xərclərin qarşısının alınması və bu layihənin
maliyyə və idarəetmə baxımından mürəkkəbliyini nəzərə alaraq qeyd olunan
qurumların ləğv edilməsi məqsədəmüvafiq hesab edilib.

Birliyin ümumi yığıncağında o da qeyd olunub ki, “Araz Kursları”
MMC-nin fəaliyyəti ali təhsil müəssisələrinə qəbul imtahanları başa
çatanadək davam etdiriləcək və ABTK-da təhsil alan və əmək
münasibətlərində olan şəxslərin hüquqları və qanuni mənafeləri
qanunvericiliyə uyğun şəkildə təmin olunacaq. Belə ki, hər bir təsisatda
təhsil alan və çalışan şagird və pedaqoji heyətin yeni dərs ili
başlayanadək müvafiq qaydada yerləşdirilməsi üçün lazımi tədbirlər
görüləcək.

Qeyd edək ki, ABTK-nın tərkibinə bir neçə bağça, ölkənin müxtəlif
bölgələrində 11 lisey, “Araz” hazırlıq kursları və Qafqaz Universiteti
daxildir.

Ölkədə öncə çaşqınlıq, sonra isə şok yaradan bu qərarın mənası
budur: Azərbaycanda 20 ildən artıqdır fəaliyyət göstərən Fətullah
Gülənin rəhbərlik etdiyi “Hizmet” hərəkatına bağlı bütün təhsil şəbəkəsi
dağıdıldı. Hələlik bu qərarın Qafqaz Universitetinə şamil olunmadığı
deyilir. Lakin digər ümumtəhsil məktəbləri bu qərardan sonra bağlanmış
saylır.

*   *   *

Gülən məktəblərinin- 1 gimnaziya, 11 lisey və 1 Beynəlxalq
İstedadlar Kompleksinin bağlanması Türkiyə mətbuatında da geniş əks-səda
yaradıb.

Qafqaz Universitetinin prorektoru Natiq Paşa da virtualaz.org-a  bu
universitetin bağlanmayacağını və Naxçıvandakı türk liseylərinin
fəaliyyətini davam etdirəcəyini deyib.

N.Paşa Azərbaycan Beynəlxalq Təhsil Kompleksinin  (ABTK) tərkibinə
“Araz” kursları ilə bərabər 1 gimnaziya, 11 lisey və Qafqaz
Universitetinin daxil olduğunu söyləyib.

Prorektor Qafqaz Universitetinin ABTK-nın tərkibində olsa da, bu
qərarın ali məktəbi əhatə etmədiyini və onun fəaliyyətini davam
etdirəcəyini bildirib.

ABTK-nın  tərkibinə daxil olan və bağlanması üçün Təhsil
Nazirliyinə müraciət edilən 11 lisey bunlardır: Ağdaş liseyi, Bakı
liseyi, Dədə Qorqud liseyi, Qafqaz gimnaziyası, Gəncə liseyi, Quba
liseyi, Lənkəran liseyi, Mingəçevir liseyi, Sumqayıt liseyi, Şəki
liseyi, Şirvan liseyi.

Naxçıvan Muxtar Respublikasında (MR) fəaliyyət göstərən Naxçıvan
Türk Liseyi, Şərur Türk Liseyi və Ordubad Qız Liseyi fəaliyyətini
dayandırmır. Səbəb kimi isə onların ABTK-nın  tərkibinə daxil olmaması
göstərilir. Naxçıvanda olan liseylər Naxçıvan MR Təhsil Nazirliyi və
“Zaman öyrətim” təhsil qurumuna aiddir. 

Məlumata görə, Naxçıvanda da “Araz” kursu fəaliyyət göstərir. Lakin
bu kurs “Araz kursları” MMC-nin nəzdində olmadığından onun da
fəaliyyəti davam etdiriləcək.

Bir sıra məlumatlı şəxslər və ekspertlər  “Gülən məktəbləri”nin
bağlanmasını Azərbaycanda “Hizmet” hərəkatına qarşı hücumun ikinci
dalğası sayırlar və hesab edirlər ki, bu proseslər Türkiyə hökumətinin
çox ciddi basqıları nəticəsində baş verir. 

Qeyd edək ki, Türkiyə baş naziri Ərdoğanın Bakıya səfərindən sonra
Azərbaycanda nurçulara qarşı başlayan hücumun ilk dalğasında Prezident
Administrasiyasının şöbə müdiri Elnur Aslanov, Dini Qurumlarla İş üzrə
Dövlət Komitəsinin sədri Elşad İsgəndərov və bəzi kiçik vəzifəli
məmurlar işdən çıxarıldılar.  Camaata bağlı bir sıra biznes strukturları
çökdürüldü, bir neçə böyük şirkətin işləri yarımçıq dayandırıldı. Bu
dalğanın ikinci mərhələsində isə göründüyü kimi “Gülən məktəbləri”nin
fəaliyyəti dayandırıldı. Bu isə Azərbaycanda camaata indiyədək vurulan
ən böyük zərbə hesab olunur. Verilən qərar həm də ölkənin təhsil
sektorunda və övladları  “Gülən məktəbləri”ndə təhsil alan valideynlər
arasında şok effekti yaradıb.

“Yeni Müsavat”a daxil olan məlumata görə, eyni proses səhiyyə
sistemində də gedir. Gülən camaatına bağlı Azərbaycanda fəaliyyət
göstərən səhiyyə müəssisələri, bir sıra məşhur klinikalar bağlanır.
Artıq onlardan bir neçəsinin fəaliyyəti dayandırılıb.  Səhiyyə Nazirliyi
lisenziyasının müddəti başa çatan bir sıra klinikaların  lisenziyasının
vaxtını uzatmaqdan imtina edir.

Göründüyü kimi, Türkiyə hökuməti Gülən camaatının Azərbaycanda
tamamilə çökdürülməsində israrlıdır və bunun  üçün bütün vasitələrdən
istifadə edərək Bakıya təzyiq göstərir. Son baş verənlərdən isə aydın
olur ki, hakimiyyət çox çalışsa da, sonadək bu təzyiqlərin qarşısında
davam gətirə bilmir.

Bundan sonra daha nələrin baş verəcəyini isə zaman göstərəcək.