Bakıda bələdiyyə sədrini döydülər

Paytaxtın Xəzər rayonundakı Qala
qəsəbəsinin bələdiyyə sədri, 1960-cı il təvəllüdlü Babayev Talıb Baba
oğlu iki nəfərin hücumuna məruz qalıb.

Virtualaz.org bildirir ki, Xəzər Rayon Polis
İdarəsindən vesti.az-a verilən məlumata görə, hadisə dünən saat 20.30
radələrində baş verib. İdarənin 1-ci polis bölməsindən bildirilib ki,
insident torpaq sahəsinin qanunsuz zəbt edilməsi ilə bağlı olub.

Belə ki, bələdiyyə sədri konkret ünvanda qanunsuz tikili aparıldığını
eşidib, həmin yerə gəlib və iki nəfərin tikinti ilə məşğul olduğunu
görüb. O,həmin şəxslərə tikintinin qanunsuz aparıldığını bildirəndə
onlar “kefimiz harada istəyir, orada da tikirik” deyə cavab veriblər.
Sonradan mübahisə davaya çevrilib. Bələdiyyə sədrinə dəmir alətlərlə
hücum çəkənlər onu möhkəm döyüblər.

Hələlik məhkəmə-tibbi ekspertizanın rəyi hazır deyil. Polis isə söz
verib ki, bələdiyyə sədrini döyənlərin kimliyini bu gün dəqiqləşdirəcək.