Sirli haker ordusunun Azərbaycana hücumu

Kaspersky”
antivirus laboratoriyasının mütəxəssisləri sirli haker ordusunun
Azərbaycan da daxil olmaqla üç ölkəyə hücumunu aşkar edib. Bu barədə laboratoriyanın mütəxəssislərinə
istinadən “The Guardian” qəzeti yazıb.

Bildirilir
ki, laboratoriya haker ordusunu ilk dəfə 2013-cü ilin fevralında aşkar
edib və onu izləməyə başlayıb. Həmin vaxt “MiniDuke” hakerləri dünyanın
 bir çox ölkələrinin dövlət təsisatlarının və elmi-tədqiqat
institutlarının məlumat bazasına hücumlar edirdi.

Lakin
“Kaspersky” laboratoriyasının mütəxəssisləri bu yaxınlarda qrupun
fəaliyyətində anomaliya aşkar ediblər. Məlum olub ki, narkotiklərin
alqı-satqısı üzrə sövdələşmələrdə iştirak edən şəxslər də “MiniDuke”nin
hədəfidir.

Hakerlər tərəfindən istifadə edilən
komandanlıq və serverlərin idarəedilməsi mərkəzini izləyən mütəxəssislər
qadağan olunmuş vasitələr, o cümlədən steroidlər və hormonların satışı
üzrə məlumatların cəmləndiyi baza aşkar ediblər.

“Kaspersky”nin
təhlükəsizlik üzrə baş təhqiqatçısı Vitali Kamlyuk həmin narkotik
maddələrin adlarını demək istəməyib. Bununla belə bu kəşf V.Kamlyuk və
həmkarlarının “MiniDuke” hakerlərinin məqsədləri barədə bəzi ehtimallar
irəli sürməsinə imkan yaradıb.

Mütəxəssislər
ehtimal edir ki, hakerlər ordusu bir neçə bölmədən ibarət “kiber
muzdlular”dan ibarətdir. Onlar müxtəlif qruplara öz xidmətlərini
satırlar və ola bilsin ki, onların müştəriləri arasında hüquq-mühafizə
orqanları, yaxud rəqib narkomafiyanın fəaliyyətini izləmək istəyən
mütəşəkkil cinayətkar qruplaşma yer alır. Həmçinin onlar dövlət
təsisatlarına öz xidmətlərini satırlar.

Hakerlərin
kim olmasından asılı olmayaraq onlar yüksək şifrələmə standartlarına,
məlumat bazalarını sındırmaq üçün yüksək bacarıqlara malikdir.
Mütəxəssislər onların fəaliyyətini izləməyin olduqca çətin olduğunu
deyirlər.

“Onlar  nəinki xüsusi xidmət
orqanlarına, dövlət təsisatlarına işləyən hakerlərdən daha çox gizli
fəaliyyət göstərən kibercinayətkarlara bənzəyir” – deyə Kamlyuk
bildirib.

Mütəxəssis deyib ki, bununla belə
haker ordusunun 2014-cü ildə əsas hədəfi dövlət orqanlarıdır.
V.Kamlyukun sözlərinə görə, hakerlər qrupunun Ukrayna, Azərbaycan və
Yunanıstandan potensial qurbanlara dair informasiyaları toplamaq üçün
açıq çıxış kodlu haker alətlərindən istifadə etdiyi qeydə alınıb.

“Onlar
elektron poçt məlumatlarından tutmuş, adları, nik adları və bütün digər
mümkün məlumatları toplayırlar” – deyə Kamlyuk “Guardian”a müsahiəsində
bildirib.

Mütəxəssisin sözlərinə görə, hakerlərin ya Şərqi Avropadan, ya Asiyadan hərəkət etdikləri təxmin edilir.(virtualaz.org)