İcra başçısına 3 milyon manatlıq yeyinti ittihamı
Kağız üzərində pulların hara xərcləndiyi yazılıb, amma reallıqda bunların tərs mütənasibliyi yetərli qədər şübhələrə yol açır
Rayondakı qaynaqlardan verilən məlumata görə, istefasını gözləyən Xaçmazın icra başçısı Şəmsəddin Xanbabayevin isə başı pul qazanmağa qarışıb. Rayonun yarısını özünküləşdirən və bir o qədərini də müavinləri arasında bölüşdürən icra başçısı bununla kifayətlənməyib, büdcənin də axırına çıxmağa çalışır. Əldə etdiyimiz məlumatlara görə, təkcə ötən il Xaçmaz Rayon İcra Hakimiyyətinə ayrılmış 3 milyon manatın nəyə sərf olunduğu bəlli deyil. Hərçənd kağız üzərində pulların hara xərcləndiyi qeyd olunub. Amma real həyatda bunların tərs mütənasibliyi yetərli qədər şübhələrə yol açır. Əlbəttə bəzi işlər var ki, onlar həqiqətən də həyata keçirilib. Məsələn, Şəmsəddin Xanbabayev “Auto Azərbaycan”dan özü üçün “Volsvagen” markalı maşın alıb və ona 18000 manat xərcləyib. Amma tikinti işlərinin satın alınması üçün ayrılmış üst-üstğə 65 min manatın isə aqibətini onun özündən başqa kimsə bilmir.Məlumatlarda bu silmə olaylarının sayının çox olduğu göstərilir. Onların sırasında avadanlıqların satın alınması adı altında 14400 manat, digər maşın və avadanlıqların satın alınması adı altında 43390 manat, inventarların satın alınması adı altında 38400 manat, idarənin digər xərclər maddəsi üzrə malların (işlərin və xidmətlərin) satın alınması adı altında 11500 manat, digər maşın və avadanlıqların satın alınması adı altında 8640 manatın yeyintiyə məruz qaldığını rayonda bilməyən yoxdur.Qeyd edək ki, bütün bunlar kiçik rəqəmlərdir. Əsas pullar isə 3 işdən əldə edilib. Onlardan biri Xaçmaz rayon İcra Hakimiyyətinin sifarişi ilə mənzil fondunun əsaslı təmir işlərinin həyata keçirilməsindən ibarət olub. “Maddi Texniki Təchizat-3” MMC tərəfindən həyata keçirilməli olan bu işlərə büdcədən 214500 manat pul ayrılıb. Amma nə mənzil fondları əsaslı təmir olunub, nə də buna həvəsləri var. Heç ortada pul da yoxdur.İkinci böyük iş isə yolların əsaslı təmir ilə bağlıdır. 1,1 manatlıq işləri həyata keçirən zaman yolların vəziyyətinin nə halda olduğunu bilmək elə də çətin deyil. Bircə dəfə maşın sürdükdə durumun dəhşətli səviyyədə kritik olduğu diqqəti çəkir.Rayonda həyata keçirilmiş abadlıq işlərinə də “söz ola bilməz”. Çünki Şəmsəddin Xanbabayevin “Maddi Texniki Təchizat-3” MMC ilə birlikdə 1 milyon manatlıq işləri bərbad haldadır. İddialara görə, icra başçısı bu pulların 50 faizini nağd şəkildə özünə götürüb.Xaçmazdakı vəziyyət təbii ki, bunlardan ibarət deyil. Həmçinin digər məsələlər də baş verir ki, zaman içində onlarla bağlı məlumat verəcəyik.
Short URL: http://www.cumhuriyyet.net/?p=9558
