Məmurlar dəfnə ayrılmış pullara göz dikib

CAR-da hakimiyyət başında olan Afrika Milli Konqresi (AMK) dəfn
mərasiminə ayrılan pulların hara və necə xərclənməsi məsələsini
araşdırmağı vəd edib.

Amma yerli mətbuat yazır ki, dəfnə ayrılmaış pulların bir hissəsi –
5,9 milyon CAR randı (532 min ABŞ dolları) elə hakim AMK partiyası
tərəfindən mənimsənilib. Hakim partiya həmin pulları məmurların birinə
bağlı olan nəqliyyat şirkəti vasitəsilə mənimsəyib.

Qeyd edək ki, hazırda CAR-da hakimiyyət başında olan
rejim dəfələrlə korrupsiyada ittiham olunub. O cümlədən hazırkı
prezident Ceykoba Zumunun paytaxtdan kənarda – Kvazulu-Natal vilayətində
özünə dövlət vəsaiti hesabına şəxsi ev inşa etdirməsi faktları üzə
çıxmışdı. Bu evin tikintisinə 18,5 milyon ABŞ dolları həsmində dövlət
xərclənib. Həmin malikanədə nəhəng hovuz, iki vertolyot meydançası,
yeraltı sığınacaqlar, polislər və mühafizəçilər üçün 20 ayrıca ev,
həmçinin prezidentin qohumlarının qalması üçün 14 rondavel (ənənəvi
Afrika evi) var.

CAR-ın keçmiş prezidenti Nelson Mandelanın dəfninə gəlincə isə bu
mərasim dekabrın 15-də onun doğma kəndi Kunuda həyata keçirilib. CAR-da
aparteid rejimi ilə fəal mübarizə apardığına görə 27 il həbsxanada yatan
və 1993-cü ildə Nobel Sülh mükafatı alan N.Mandelanın vəfatı ilə
əlaqədar ölkədə 10 günlük matəm elan olunmuş, silsilə tədbirlər
keçirilmiş və buna xeyli vəsait xərclənmişdi. İndi isə həmin pulların
bir qisminin korrupsioner məmurlar tərəfindən oğurlanmasına dair faktlar
ortaya çıxır.