Qubada əmisi oğlunun arvadını qaçıran gənci linç edib öldürdülər
Daxili İşlər Nazirliyi Qubada əmisi oğlunun arvadını qaçıran kişinin döyülərək öldürülməsi hadisəsi barədə rəsmi məlumat yayıb.
DİN-in mətbuat xidmətindən virtualaz.org-a bildirilib ki, oktyabrın 19-da Quba Rayon Polis Şöbəsinə rayon sakini olan 25 yaşlı qadının itkin düşməsi barədə məlumat daxil olub.
Dərhal polis əməkdaşları tərəfindən əməliyyat-axtarış tədbirlərinə başlanılıb. Araşdırmalarla qadının həmin gün ərinin qohumu tərəfindən öz razılığı ilə qaçırıldığı müəyyən edilib.
Oktyabrın 22-də həmin şəxs bu əməli törətdiyinə görə qadının yaxın qohumları tərəfindən yaşadıqları kənd ərazisində döyülüb və o, aldığı xəsarət nəticəsində hadisə yerində ölüb.
Polis və prokurorluq orqanları əməkdaşlarının birgə keçirdikləri istintaq və əməliyyat tədbirləri nəticəsində bu ağır cinayəti törətməkdə şübhəli bilinən bir neçə şəxs saxlanılıb.
Faktla bağlı Cinayət Məcəlləsinin müvafiq maddəsi ilə cinayət işi başlanılıb.
Hazırda cinayət işi üzrə təxirəsalınmaz istintaq və əməliyyat tədbirləri davam etdirilir.
* * *11:40
Virtualaz.org-un xəbərinə görə, hadisə Quba rayonunun Tülər kəndində baş verib.
Kənd sakinləri bildiriblər ki, 26 yaşlı Elşad Əsədov həyat yoldaşından boşanıb. Bir müddət imiş ki, əmisi gəlinini – Aynurə Əsədovanı sevirmiş. Ötən həftə bir-birinə qoşulub qaçan sevgililər az müddət sonra yaxalanaraq kəndə geri qaytarılıblar. E.Əsədov qaçırılan gəlinin yaxınları tərəfindən vəhşicəsinə döyülüb.
Quba rayon prokurorluğundan aldığımız məlumata görə, hazırda cinayət işi başlanılıb. İstintaq aparılır.
* * *10:34
Qubada ailəli qadını qaçıran kişi döyülərək öldürülüb.
25 yaşlı Aynur Əsədova həyat yoldaşının əmisi oğlu 26 yaşlı Elşad Əsədov tərəfindən qaçırılıb. Məlumata görə, qadın öz razılığı ilə E.Əsədovla birgə gedib.
Hadisədən sonra qızın atası Sadıq Dadaşov, qohumları Elman Muradov və Mətləb Muradov E.Əsədovu döyərək ona ağır bədən xəsarəti yetiriblər. Hadisədən sonra E.Əsədov aldığı xəsarətlərdən dünyasını dəyişib.
Hər üç şəxs saxlanılıb. Fakt üzrə araşdırmalar davam etdirilir. (Report)
Short URL: https://www.cumhuriyyet.net/?p=123919
