Erməni jurnalist: Azərbaycan keyfiyyətli yol çəkib

Erməni müxalifətçi, jurnalist Nairi Ohikyan özünün “Facebook” səhifəsində Azərbaycanın Laçın dəhlizinə alternativ çəkdiyi yolla bağlı post paylaşıb.

Cumhuriyyet.az xəbər verir ki, o, yolun keyfiyyətli olduğunu deyib, eyni zamanda Ermənistanın 9 ayda bir yolu çəkə bilməməsindən şikayətlənib.

“Azərbaycanlılar tərəfindən Laçın dəhlizinə alternativ olan yeni yol artıq hazırdır. Mən həqiqətən şahid oldum ki, Azərbaycan keyfiyyətli yol çəkib. Hazırda yola Rusiya sülhməramlıları nəzarət edir. Amma təəssüflər olsun ki, Ermənistan 9 ayda yolun 6 kilometrini tamamlaya bilməyib. Azərbaycan isə bu müddət ərzində 30 kilometrə qədər yol çəkib”, – deyə erməni jurnalist bildirib.

Qeyd edək ki, Azərbaycan tərəfinin çəkdiyi yeni yol Ermənistanla sərhəddən – Gorusun Kornidzor kəndindən başlayır, Laçından yan keçərək Şuşa rayonunun Kiçik Qaladərəsi və Böyük Qaladərəsi kəndlərinədək uzanmaqla Turşsu kəndində mövcud magistralla kəsişir. Yeni yol Laçın rayonunun 6 kəndindən keçir.

Ermənilər yeni yolun açılışından sonra Laçın şəhərinin tamamilə Azərbaycanın nəzarətinə keçəcəyindən ciddi şəkildə narahatdırlar. Bu halda 30 ildir Laçın şəhərinin mərkəzində müvəqqəti məskunlaşmış ermənilərin oranı tərk etməsi də gerçəkləşəcək. Eyni zamanda, hazırda Zabuxda qanunsuz məskunlaşmış 50-dən çox erməni ailəsinin də oranı tərk edəcəyi gözlənilir.

Short URL: https://www.cumhuriyyet.net/?p=180349