Zakir Fərəcov və müavinləri sahibkarların hədəfində: fəhlələr etiraz aksiyasına hazırlaşır

16.02.2023 - 11:20

Hazırda fəaliyyətdə olan icra başçıları özlərindən əvvəl həbs edilən həmkarlarının aqibətindən ibrət götürmək istəmirlər. Məhz bunun nəticəsidir ki, hazırda fəaliyyətdə olan icra başçılarının bəziləri hələ də öz qanunsuz əməllərini davam etdirirlər.
Fəaliyyətindən ciddi narazılıq olan icra başçılarından biri də Zakir Fərəcovdur. O, Azərbaycanın böyük şəhərlərindən birinə rəhbərlik edir. Uzun müddətdir ki, bir qrup sahibkar müxtəlif media orqanları və dövlət qurumlarına Zakir Fərəcovdan şəhərin abadlaşması üçün gördükləri işlərin pulunu ala bilməməklə bağlı şikayətlər ünvanlayırlar.Maraqlıdır ki, İcra Hakimiyyəti və onun başçısı Zakir Fərəcov ciddi əsaslar gətirmədən, iş adamlarına heç bir borclarının olmadığını iddia edirlər. Hətta Zakir Fərəcov bu məsələdə proseslərdən ümumiyyətlə xəbəri olmayan müavinlərini qabağa verib, edilən şikayətlərə onların imzası ilə yarımçıq, heç bir əsası olmayan cavablar verir.
Fərəcovun ünvanına bir sıra ittihamlar səsləndirən sahibkarlar illərdir gördükləri işin müqabilində pullarını ala bilmədiyini deyir. Onların sözlərinə görə, dəfələrlə Prezident Admnistrasiyasında olublar və onlar məsələni araşdıracaqlarına söz veriblər.
“Biz bütün sənədləri təqdim etmişik. Zakir Fərəcovun bizə qarşı etdiyi qanunazidd hərəkətlərini əks etdirən dəlil və sübutları da vermişik. Söz veriblər ki, məsələni müsbət şəkildə həll edəcəklər. Lakin görünən odur ki, Zakir Fərəcov heç kimdən çəkinmir. Əgər çəkinsəydi bu qədər qanunsuzluğa davam etməzdi”.
İş adamları qeyd edir ki, Zakir Fərəcov onlarla görüşündə dövlətin ona pul ayırmadığını, Sumqayıtda bütün işləri öz puluyla etdiyini söyləyib.
“Bizə maraqlıdır, əgər dövlət tərəfindən Sumqayıta pul ayrılmayıbsa, bu qədər bahalı layihələri Zakir Fərəcov hansı pulla əmələ gətirib? Təkcə, Dənizkənarı Bulvarın smeta dəyəri 100 milyon manata yaxındır. Bir icra başçısında bu qədər pul hardandır? Əgər bu qədər pulu varsa, şübhəsiz, Fərəcov onu düzgün yollarla əldə etməyib. Aydın məsələdir ki, Zakir Fərəcov dövlətdən pul ayrılmaması ilə bağlı dedikləri ağ yalandır. Bu adam dediyim kimi, super yalançıdır. Hər cür dona girir ki, sahibkarların pulunu verməsin”.
Aldadılan sahibkarlar vurğulayır ki, Zakir Fərəcovun əyri yollarla pul qazanması sirr deyil. Hətta bunun üçün icra başçısının özünün xüsusi vasitələrinin olduğunu da iddia edir. “Sumqayıt bulvarının bütün işlərini biz görmüşük. Amma sonradan məlum oldu ki, həmin işlər adı var, özü yox, həm də yaxın adamlarının adına yaradılmış şirkətlərin adına yazılıb. Məqsəd də ayrılmış pulu nağdlaşdırmaq idi və bunu da edib. Sonuncu belə əməliyyatlardan biri də Sumqayıt Bulvarının tikintisinə 3,7 milyon manat pulun ayrılmasıdır.
Həmin pul Zakir Fərəcovun müavini Gündüz Əliyevin bacısı oğlanlarının adına yaradılmış şirkətə köçürülüb. Fərəcov da həmin pulla oğluna Bulvarda “Paseydon” adlı restoran tikdirib. Bu adam o qədər arxayındır ki, oğlu prokuror olduğu halda və qanunla bizneslə məşğul olması qadağan edildiyi halda restoranı onun adına sənədləşdirib.
Sahibkarlardan pul yığılması, iş adamlarının pulunu kəsmək də bir ayrı məsələdir və onun əziyyətini çəkənlərdən biri də bizik”.
Sahibkarlar deyir ki, Sumqayıtın icra başçısının pul məsələlərinə İcra Hakimiyyətinin tikinti və memarlıq idarəsinin müdiri Adil Xudadatov baxır. “Bu adam vaxtıyla “Kamaz” sürücüsü olub. Abşeronda işləyəndə də Zakir Fərəcovun xeyli pulunu mənimsəmişdi, hətta deyilənlərə görə, bu əməlinə görə 15 sutka həbsdə yatıb. İndi Adil Xudadatov necə, hansı yolla Sumqayıtda vəzifəyə gətirilib, bəlli deyil. Bəlli olan odur ki, bu adam hər gün şəhərdə daşı-daş üstə qoymaq istəyənlərin başının üstünü kəsdirir ki, pul yığsın.
Zakir Fərəcov onu sahibkarların, ev tikənlərin, balkonunu təmir etdirənlərin üstünə göndərir ki, pul yığıb gətirsin.
Axı, Adil Xudadatov kimdir ki, sahibkarlardan xərac toplayır? Nə haqla, hansı qanunla pul yığır? Şəhərdə təmir-tikinti işləri aparan şirkətlərə pul aparan da Adildir. Məgər dövlətin bankı, bank hesabı yoxdur ki, iş görənlərə pul nağd şəkildə verilir? Qayda var, qanun var, köçürmə üsulu var. Lakin Zakir Fərəcov üçün bunların heç bir əhəmiyyəti yoxdur. Adil Xudadatovu verib qabağa, onun əliylə Sumqayıtda pul yığdırır, özü də qanunsuz olaraq”.
Sahibkarlar onu da bildirir ki,  15 gündən artıqdır ki icra başçısının qəbuluna düşə bilmirlər: “Z.Fərəcov hər dəfə bir bəhanə ilə qəbulu təxirə salır”. Sahibkarlar sonda onu da deyir ki, Zakir Fərəcov həbs olunan həmkarlarının aqibətindən nəticə çıxarmalıdır. “DTX yarım ilin içində 5 icra başçısı həbs edib. Hamısı rüşvət aldığına, qanunsuzluq etdiyinə görə həbs olunublar.
Zakir Fərəcov köhnə həmkarlarının aqibətini gözünün önünə gətirsin və ibrət alsın. Günün birində onu da qandallayıb, həbs edəcəklər. Çünki bu qədər qanunsuzluq yerdə qalmaz. Bunca insanın haqqını yemək, bunca insanı incitmək, hədələmək, qorxutmaq cavabsız qalmaz. Əminəm ki, dövlət Zakir Fərəcovun törətdiyi əməllərə qiymət verəcək və onun özbaşınalığına son qoyacaq”.

Sahibkarlar bildirir ki, artıq dözə bilmirlər. “Zakir Fərəcovun vermək istəmədiyi pulun heç də hamısı bizə çatmır. Biz Bulvarın və şəhərdəki tikinti işlərinə görə, mal və materialları başaqalarından almışıq. Hazırda da onlara borclu qalmışıq. Onlar da haqlı olaraq öz pullarını tələb edirlər”, -deyə sahibkarlar vurğulayıb.
Onların sözlərinə görə, Zakir Fərəcov həmin pulu verməmək üçün müxtəlif bəhanələr gətirir: “Bir ara bizdən həmin pulun 30 faizini tələb edirdi. Üstəlik, tələbi yerinə yetirilməyəcəyi təqdirdə, bizi həbs etdirəcəyi ilə hədələyirdi. Bu işə yaramayanda, başqa vasitəyə əl atdı. Sumqayıt İcra Hakimiyyəti Tikinti və Memarlıq şöbəsinin müdiri Adil Xudadatovu qabağa verdi və dedi ki, pulumuzu o verəcək. O da gah dedi, pul yığmayıb, gah dedi işçiləri hələ ərazidən qayıtmayıb, gah da dedi ki, onluq məsələ yoxdur. İndi də Fərəcov başlayıb ki, tikintinin smetasını araşdırır, həm də görülən işlərlə bağlı araşdırma aparır. Nəyin araşdırmasını aparacaq? Vaxtında bir dəfə qiymətləndirmə təşkil elədi, məlum oldu ki, həmin işlərin real dəyəri ayrılan puldan 4 milyon manat çoxdur. İndi durub təkrar araşdırma aparmaq eşqinə düşmək, vaxt udmaq, borcu qaytarmamaq istəyindən başqa bir şey deyil”.
Zakir Fərəcovun məhkəməyə verilməsinə gəlincə, borc sahibləri ümid edir ki, hüquqi müstəvidə apardıqları mübarizənin nəticəsi olacaq. “Bütün dəlil və sübutları, habelə zəruri sənədləri toplayaraq, məhkəməyə müraciət etmişik. Sonradan bizimlə birlikdə əziyyət və zəhmət çəkmiş 400 nəfərdən çox fəhlə də iddiaçı kimi bizə qoşulub. Onlar həm məhkəməyə, həm də Korrupsiyaya Qarşı Mübarizə Baş İdarəsinə müraciət ediblər. Ümid edirik ki, məhkəmə Zakir Fərəcovun qanunsuz əməllərini təsdiqləyib, bizim qanuni haqqımızın geri qaytarılmasında yardım edəcək”.
Sahibkarlar və işçilər təkcə Zakir Fərəcovu deyil, həmçinin onun sağ əli sayılan Adil Xudadatovun və Gündüz Əliyevi də məhkəməyə verəcəklərini bildirib. Onlar bu işlərdə müavinlərin də böyük rolunun olduğunu iddia edirlər. Sahibkarlar onu da bildiriblər ki, onlar haqqı olan pullarını alana qədər mübarizələrinə davam edəcəklər. Onlar həmçinin qeyd ediblər ki, məsələ ilə bağlı təkrar Prezident Admnistrasiyasına müraciət edəcəklər. Eyni zamanda, Prezident İlham Əliyevdən də dəstək istədiklərini bəyan ediblər. Hüquqi müstəvidə haqlarını tələb etməklə yanaşı sahibkarlar və fəhlələr müxtəlif aksiyalar da planlayır. Bu sırada Bakı- Quba yolunun bağlanması da daxildir ki bu aksiyanın böyük rezonans doğuracağı şübhəsizdir.

 

https://i0.wp.com/www.cumhuriyyet.net/wp-content/plugins/sociofluid/images/google_16.png?w=500&ssl=1 https://i0.wp.com/www.cumhuriyyet.net/wp-content/plugins/sociofluid/images/facebook_16.png?w=500&ssl=1 https://i0.wp.com/www.cumhuriyyet.net/wp-content/plugins/sociofluid/images/yahoobuzz_16.png?w=500&ssl=1 https://i0.wp.com/www.cumhuriyyet.net/wp-content/plugins/sociofluid/images/twitter_16.png?w=500&ssl=1

Short URL: https://www.cumhuriyyet.net/?p=190399

XƏBƏR LENTİ

virtual_roadi

Рейтинг@Mail.ru

Telefon:077 333 90 09
E-mail:cumhuriyyetqezeti@gmail.com;
Sayt "Yeni Cumhuriyyət" qəzetinin rəsmi internet saytıdır.
Saytın yazılarından istifadə olunan zaman istinad və yazının linkinin göstərilməsi zəruridir
Hazırladı - "QURDQANLI" DSGN

en son xeberler

Mart 2024
BE ÇA Ç CA C Ş B
 123
45678910
11121314151617
18192021222324
25262728293031