Gələn il artacaq maaşları bu ilin inflasiyası “yeyib-bitirib”

“Ölkədə dövlət ümumi təhsil müəssisələrində 150 minə yaxın müəllim çalışır, onların orta aylıq maaşı 564 manatdır, əgər maaşlar 20% artsa, yanvardan həmin şəxslər 674 manat maaş alacaqlar”.

Bu fikirləri iqtisadçı ekspert Natiq Cəfərli bildirib.

Onun sözlərinə görə, rəsmi rəqəmlərə görə, ərzaq məhsulları illik müqayisədə 14,9% bahalaşıb.

“Bu rəsmi rəqəmlərdir, qeyri-rəsmi hesablamalar ərzaq məhsullarında bahalaşmanın 30% civarında olduğunu göstərir. Nəzərə alsaq ki, ölkə əhalisi qazancının 52%-ə yaxınını ərzaq məhsullarına xərcləyir, bu o demək dir ki, gələn il artacaq maaşları bu ilin inflasiyası “yeyib-bitirib””.

N.Cəfərli qeyd edib ki, maaş və təqaüdlərin, sosial müavinatların artması çox yaxşıdır:

“Amma əgər hökumət inflyasiyanın artım tempini aşağı salmasa, qiymətlər sabitləşməsə, artımların əhalinin real gəlirlərinin artmasına heç bir təsiri olmayacaq. İnflyasiya ilə mübarizə üçün hökumətin əlində kifayət qədər iqtisadi və inzibati-hüquqi alətlər var. Dövlət tərəfindən tənzimlənən qiymətlərin aşağı çəkilməsi (dizel, benzin, su, qaz, elektrik qiymətlərinin 20% ucuzlaşdırılması), vergilərin və gömrük rüsumlarının diferensial yanaşma ilə formalaşdırılması, rəqbətli mühitin yaradılması – bu addımlar olmasa, dünyada da gedən qiymət artımı idxal inflyasiyası kimi daxili xroniki problemlərin üzərinə gələrək, inflyasiyanı sürətləndirəcək, əhalinin yoxsullaşması prosesi davam edəcək”.