Azərbaycanda XI sinfi bitirənlər Amerikada, Almaniya oxuya bilmirlər – SƏBƏB
“Hazırda Azərbaycan Beynəlxalq Konvensiyanın üzvüdür. “ENİC-NARİC” sistemi var və bütün ali təhsil müəssisələrimiz bu sistemdə akreditasiyadan keçib. Həmçinin beynəlxalq reytinqdə də varıq. Buna görə də Azərbaycan universitetlərinin diplomlarının xarici ölkələrdə tanınması ilə bağlı hər hansı problem yoxdur. Birmənalı şəkildə hər kəs bilməlidir ki, Azərbaycan ali təhsil müəssisələrindən məzun olan şəxslərin diplomları rahatlıqla xarici ölkələrdə tanınır. Azərbaycanda təhsil alan xarici vətəndaşlar da ölkələrinə qayıdandan sonra diplomlarını həm tanıda, həm də iş tapa biləcəklər. Burada heç bir məhdudiyyət yoxdur”.
Bu sözləri Pravda.az-a açıqlamasında təhsil eksperti Kamran Əsədov deyib. Ekspert bildirib ki, sadəcə, bəzi fənlərin kreditlərində problem olur: “Yaxud da tələbənin ixtisası beynəlxalq ixtisaslar deyilsə. Məsələn, bizdəki ixtisasların müəyyən bir qismi xarici ölkələrdə yoxdur, yəni xarici ölkələrdə eyniadlı ixtisaslara qəbul aparılmır. Bu zaman problem yaranır. Tibb, hüquqşünaslıq, beynəlxalq münasibətlər, kompüter elmləri, kompüter mühəndisliyi, informasiya texnologiyaları, informasiya təhlükəsizliyi kimi ixtisaslardan məzun olanlar, təbii ki, bütün dünyada diplomlarını rahatlıqla tanıda bilirlər. Bir də o zaman problem olur ki, diplomlar Azərbaycan tərəfindən rəsmi olaraq verilməyib. Kimlərsə qeyri-qanuni yollarla diplom verə bilirlər. Belə halda problem yarana bilər. Bəzən tiblə bağlı Almaniyaya, Amerikaya, Fransaya gedəndə də problem olur. Bu da ixtisasın adı, keçirilən fənlər və onların kreditləri ilə bağlıdır. Məsələn, XI sinfi bitirib xaricə gedənlər bəzən Amerikada, Almaniya oxuya bilmirlər, çünki onlarda təhsil 12 illikdir. Hazırda ölkəmizdə 51 ali təhsil müəssisəsi fəaliyyət göstərir. Ali təhsil müəssisələrimizdə bakalavr və magistr pilləsi üzrə 187 min azərbaycanlı tələbə, həmçinin xarici ölkələrdən gələn 15 minə yaxın tələbə təhsil alır. Təbii ki, son illər ərzində Azərbaycanda təhsil almağa gələn xarici ölkə vətəndaşlarının sayında ciddi şəkildə artım müşahidə edirik. Bunun bir neçə səbəbi var. Birinci səbəb Azərbaycanda ali təhsil müəssisələrinin beynəlxalq reytinq istiqamətində irəliləməsidir. İkincisi, diplomların tanınması ilə bağlı ciddi işlər aparılması məsələyə öz təsirini göstərib. Bu gün azərbaycanlı gənclərin xarici ölkələrə təhsil almağa getmələri sevindirici haldır. Hesab edirəm, məzun olan azərbaycanlı tələbələrin xaricə getmələri ölkəmizə ixtisaslı kadrların gəlməsinə müsbət təsir göstərir”.
Short URL: http://www.cumhuriyyet.net/?p=200235
