Şəfqət bacıları doğum günü olan əsgərin dünyaya dönüm gününü də qeyd etdilər
Təsirli videodur. Yaralı əsgər. Ad günü hayında olmayan, canı ağrıyan igid döyüşçü. Yanında ana yox, bacı yox.
Birdən qapı açılır və əllərində tort və üçrəngli bayraq olan şəfqət bacıları içəri daxil olur. Biri qazi gizirin saçını sığallayır, biri ona tort şamı üfürtdürür…
Bu, onun həm birinci dəfə dünyaya gəldiyi gündür, həm də yenidən dünyaya qayıtdığı gündür. İraq-iraq, yaxşı ki, yarası ağır olmayıb.
Bu mələksima tibb bacılarının bu hərəkəti də təqdirəlayiqdir. Kimin ağlına gəlibsə, ağlıyla min yaşasın.
Millət belə olur, hamı əldə silah döyüşməyə bilər, səngərlər fərqli ola bilər, fəqət ürəklər bir döyünəndə ortaya belə riqqətdoğurucu mənzərələr çıxır.
Short URL: http://www.cumhuriyyet.net/?p=155249