DTX-nın ifşa etdiyi “Qızıl mafiyası” ilə bağlı şok iddialar, ilginc adlar…

19.11.2016 - 02:55

“Ramin Paşayev vasitəsilə, “Riyad” Mühafizə Xidmətinin İnqilab küçəsindəki binasınının zirzəmisində icarəylə işləyən sexdə “lom” qızıllar əridilib külçə halına salınır, sonra isə ölkədən çıxarılır”

Buyaxınlarda ölkə mətbuatında Azərbaycandan qaçaqmalçılıq yoluyla qızıl çıxaran şəxslərin saxlanılması barədə məlumat yayıldı. Yayılan məlumatda deyilir: “Azərbaycan Respublikası Dövlət Təhlükəsizliyi Xidmətinin (DTX) əməkdaşları Astara sərhəd nəzarət-buraxılış məntəqəsində əməliyyat keçirib. Əməliyyat zamanı 5 nəfər saxlanılıb. Belə ki, Astara sərhəd nəzarət-buraxılış məntəqəsindən ölkəyə qızıl-zinət əşyalarını qaçaqmalçılıq yolu ilə keçirən Amur Məcidov DTX əməkdaşları tərəfindən saxlanılıb. Məlum olub ki, A.Məcidov Ümrə (kiçik Həcc) ziyarətindən geri dönərkən, Səudiyyə Ərəbistanından qızıl-zinət əşyalarını ölkəyə qaçaqmalçılıq yolu ilə gətirib. A.Məcidovun bu əməli Astara sərhəd nəzarət-buraxılış məntəqəsinin əməkdaşlarıilə birgə həyata keçirdiyi məlum olub. Nəticədə A.Məcidov və Astara sərhəd-buraxılış məntəqəsinin 4 əməkdaşı saxlanılıb. A.Məcidov barəsində 4 ay müddətinə həbs qətimkan tədbiri seçilib. 4 nəfər gömrük əməkdaşı isə istintaqa cəlb olunub. İstintaq tədbirləridavam etdirilir (oxu.az ).

Qeyd edək ki, bundan əvvəl də, bu il oktyabrın sonlarında ölkədən 8 kiloqram qızıl çıxarmağa çalışan iki nəfərin, o cümlədən, daha altı nəfər şübhəli şəxsin saxlanıldığı barədə məlumat yayılmışdı (apa.az)

Verilən məlumata görə, 27-28 oktyabr tarixində gerçəkləşən əməliyyatlar nəticəsində “Hacı Amur” kimi tanınan Amur Qabil oğlu Məcidov və onunla “əməkdaşlıq” edənbir neçə gömrük xidməti əməkdaşı həbs olunub. Bu günlərdə isə 365info.az saytına sözügedən qruplaşmanın ictimaiyyətdə bilinməyən tərəfləri və Azərbaycanda “qızıl mafiyası”nın iş metodu barədə bir sıra mənbələrdən məlumatlar daxil olub. Həmin materialı cumhuriyyet.az olaraq olduğu kimi diqqətinizə çatdırırıq:

“Mənbələrin verdi məlumatlara görə, diqqətdənkənarda qalan başqa fiqurlar da var və onların “qızıl marşrutu”nda Azərbaycan-Gürcüstan sərhədi, “Qırmızı Körpü” məntəqəsi də yer alır. Saytlarda 8 kiloqram qızılın tutulduğunu deyirlər, lakin bu qruplaşma hər ay ölkədən 100-150 kiloqram qızılçıxarır. Bu isə aya 4-5 milyon dollar deməkdir. Ayrı-ayrı adamlara hər işə görə 2-3 min manat verirlər, qızılı İrana və Türkiyəyə aparıb, orda reallaşdırırlar. Sonra isə o pulu “yuyularaq”, ayrı-ayrı vasitələrlə, o cümlədən müxtəlif mallar idxal edib satmaqla reallaşdırırlar.

Daxil olan məlumatlarda “Hacı Qabil” kimi tanınan Qabil Hüseyn oğlu Məcidovun adı hallanır. “O, əslən Masallının Mollaoba kəndindəndir. Qızıl qaçaqmalçılığını da adətən, onun həmkəndliləri, Masallıdan və digər cənub rayonlarından olan adamlar gerçəkləşdirir. Bəzən, “Sədərək” və “Binə”də kimsə xaricdən mal gətirmək istəyirsə, pulu burda Qabil Məcidovun Maarif adlı adamına verir, Hacı Qabilin Türkiyə və İrandakı adamları da onlar üçün mal vurub göndərir. Bir sözlə, bu şəkildə “başa-baş” ödəşirlər”. Qabil Məcidovun “Moskva” Univermağı və“Laçın” Univermağında bir neçə qızıl mağazası var.

Verilən məlumata görə, “Laçın”da Qabil Məcidovun işlərinə Firdovsi adlı şəxs nəzarət edir. “Qabil Məcidov bu univermaqlardan, eləcə də Sumqayıt və Gəncədən vətəndaşların satdığı qızılları toplayır, sonra əridərək, külçə halına salıb ölkədən çıxarır. Bu işdə ona Sabit Mazakov adlı bir adamı, eləcə də Fərid Faiq oğlu Orucov və Rauf Faiq oğlu Orucov adlı adamlar kömək edir. Bu qardaşlar “Moskva”Univermağının direktoru Elmira Mədətovanın qohumlarıdır. Həmçinin, qızılın əridilməsində Ramin Ələmdar oğlu Paşayev adlı şəxs iştirak edir ki, onun vasitəsilə, “Riyad”Mühafizə Xidmətinin İnqilab küçəsindəki binasınının zirzəmisində icarəylə işləyənsexdə “lom” qızıllar əridilib külçə halına salınır, sonra toplanılıb Hacı Amura və ya Hacı Qabilin digər adamlarına təhvil verilir. Ramin Paşayevin Siyavuşadlı bacanağı həmin zərgərlik sexində işləyir. Onun Gəncədən qızıl toplayıb gətirən Şahbaz Şahbala oğlu Şükürlü adlı bir adamı da var”, – deyə mənbələr qeyd edir.

Mənbələrin məlumatına görə, “Riyad”ın rəhbərliyi sözügedən sexdəki fəalyyətdən xəbərsizdir, yoxsa, hər hansı vergi verməyən, qanunsuz işlərlə məşğul olan şəxslərə zirzəmini icarəyə verməzdilər. Mənbənin sözlərinə görə, oğlunun həbsindən sonra, Qabil Məcidov özünün 10-dan çox qızıl mağazasında ciddi tədbirlərə başlayıb: “Bu mağazalarda saxtakarlıqla düzəldilib satılan, əyarları düz gəlməyən qızıl əşyalarısatılır. Hacı Amurun həbsindən sonra, bu “geydirmə” qır-qızıl yığışdırılıb. Ümumiyyətlə, təkcə “Moskva” Univermağındakı mağazalarda bir ay içində Hacı Qabilin 30-40 milyon dollarlıq qızıl və qiymətli daş-qaşları dövriyyə edir. Özünün də Türkiyədə “Arzum” adlı firması var ki, bu firma kiçik miqyasda fen vədigər məişət texnikası, eləcə də parfüm istehsal edir. Hacı Qabilin Qafqaz Müsəlmanları İdarəsinin sədr müavini Hacı Fuad Nurullahla da yaxşı əlaqələri var. Hacı Fuad tez-tez “Moskva” Univermağına gəlib-gedir, hətta bəzi yerlərə Hacı Qabil üçün xahişə də gedib”.

Qeyd etmək istəyirik ki, bu mənbələrin etibarlılığı yoxlanılır. Noyabrın 18-də 365info.az əməkdaşı məsələyə aydınlıq gətirmək üçün, Hacı Qabil Məcidovun mobil nömrələrinə dəfələrlə zəng etdi. Lakin sözügedən şəxsə zəng çatmadığında, biz Fərid Orucovla əlaqə saxladıq. F.Orucov Hacı Qabili tanıdığını dedi, eyni zamanda qeyd etdi ki, “deyəsən, Hacı Qabil indi Bakıda deyil”. Onun sözlərinə görə, Q.Məcidovun ürəyi xəstədir və tez-tez əməliyyat olunur, müalicə alır. “Hacı Amurdan xəbərim yoxdur. Mən və qardaşım Elmira Mədətovanın qohumu deyiləm.

“Moskva” Univermağında iki minə yaxın insan işləyir, hamı bir-birini tanıyır. Dediyiniz işlərdən xəbərim yoxdur. Əgər bir günahımız olsaydı, hüquq mühafizə orqanları müəyyən edərdi. Mən çox xarici ölkəyə səfər etmişəm, amma dediyiniz qaçaqmalçılıq işləriylə məşğul deyiləm”, – deyə F.Orucov bildirdi. Ramin Paşayev adlı şəxs də Hacı Qabil və oğlu Amuru tanıdığını, amma onların indi harda olduğu barədə məlumatsız olduğunu bildirdi: “Sizə verilən məlumat doğru deyil, böhtandır. Mən bu işlərlə məşğul deyiləm”.

Məlumatlarda adı keçən QMİ sədrinin müavini Hacı Fuad Nurullah həqiqətən də Qabil Məcidovla tanış olduğunu, eləcə də Amur Məcidovun tutulmasıyla bağlı məlumatı oxuduğunu dedi. “Hacı Qabil mənim həmkəndlimdir. Mən başqa sahəylə məşğulam, o başqa sahəylə”, – deyə Fuad Nurullah bildirdi. “Hacı,bizə daxil olan məlumatda bildirilir ki, siz tez-tez “Moskva” Univermağına Hacı Qabilin yanına gedib-gəlmisiniz və hətta ona görə kimlərəsə xahiş də etmisiniz”, – deyə qeyd etdik.

“Mən indi tədbirdəyəm, işim var”, – deyə QMİ sədrininmüavini dəstəyi asdı. “Riyad” Mühafizə Xidmətinin qərargah rəisi Səməd müəllim (soyadını bizə bildirmədi – red) İnqilab küçəsində baş ofisin yerləşdiyini qeyd etdi. “Amma deyə bilərəm ki, orda belə bir zirzəmi və ya sex yoxdur. Sizin verdiyiniz məlumatı rəhbərliyə bildirərəm, araşdırarıq”, – deyə Səməd müəllim 365info.az-a bildirdi. Araşdırma zamanı Sabit Mazakova da dəfələrlə zəng etdik, mobil nömrəsinə zəng çatmadı. Həmçinin, başqa bir məlumat da əldə etdik ki, Qabil Məcidov nə Bakıdan, nə də ölkədən getməyib və onu bu gün “Moskva” Univermağında görüblər. Yazı sayta gedərkən, Qabil Məcidovla danışmaq imkanı əldə etsək də, qarşı tərəf bizə açıqlama vermək istəmədi: “Çox hədər yerə zəng edirsən. Sən nə istəyirsənyaz, biz məhkəmədə aydınlaşdırarıq, kim haqqdır, kim nahaqq”.