Paytaxtda mühüm diplomatik görüş – Bakı Bəyannaməsinin detalları
Regional proseslərin indiki həssas vaxtında üç ölkənin XİN başçılarının təması xüsusi əhəmiyyət daşıyır; ictimaiyyətə açıqlanması diplomatik baxımdan doğru olmayan məsələlər də var
Martın 15-də Bakıda Azərbaycan-Gürcüstan-Türkiyə xarici işlər nazirlərinin 9-cu üçtərəfli görüşü baş tutub.
Regional proseslərin indiki həssas vaxtında bu görüşün xüsusi əhəmiyyəti və həm ictimaiyyətə açıqlanan, həm də açıqlanması diplomatik baxımdan doğru olmaya mühüm məqamları var.
Xarici İşlər Nazirliyindən verilən məlumatda deyilir ki, nazir Ceyhun Bayramov tədbirdə açılış nitqi ilə çıxış edib. O, təməlində tarixi qonşuluq və dostluq əlaqələri dayanan Azərbaycan, Gürcüstan və Türkiyə arasında mövcud regional əməkdaşlığın beynəlxalq hüququn ərazi bütövlüyü və suverenlik kimi təməl prinsiplərinə əsaslandığını diqqətə çatdırıb.
Bu istiqamətdə 3 ölkə arasında mövcud yüksək səviyyəli dialoqun, parlamentlərarası, habelə müxtəlif dövlət qurumları arasında əlaqələrin regional və beynəlxalq platformalar çərçivəsində əməkdaşlığa töhfə verdiyi qeyd olunub.
Azərbaycan, Gürcüstan və Türkiyə arasında iqtisadiyyat, ticarət, investisiyalar, enerji təhlükəsizliyi, nəqliyyat və kommunikasiyalar, kənd təsərrüfatı, su resurslarının səmərəli idarəçiliyi, yüksək texnologiyalar, turizm, humanitar və s. istiqamətlər üzrə qarşılıqlı faydalı əməkdaşlıq gündəliyinin mövcudluğu məmnunluqla qeyd edilib.
Bölgənin alternativ enerji, habelə nəqliyyat-kommunikasiya potensialını nəzərə alaraq, Xəzər və Qara dəniz hövzələrini birləşdirən uğurlu enerji layihələrinin bağlantılar və yaşıl enerji sahələrində təşəbbüslərlə davam etdirilməsinin vacibliyi vurğulanıb.
C.Bayramov postmünaqişə dövründə bölgədə mövcud vəziyyət, işğaldan azad olunmuş ərazilərdə aparılan bərpa və yenidənqurma işləri, minatəmizləmə fəaliyyəti, o cümlədən Azərbaycan və Ermənistan arasında normallaşma və sülh gündəliyi barədə ətraflı məlumat verib.
Azərbaycan torpaqlarının Ermənistanın işğalından azad olunması, habelə bütün ərazilərimizdə suverenliyimizin tam bərpasından sonra bölgədə sülh üçün tarixi imkanın yarandığını diqqətə çatdıran nazir Ceyhun Bayramov, bu istiqamətdə beynəlxalq ictimaiyyət tərəfindən Ermənistanı revanşist ritorikaya təşviq edən addımlardan çəkinilməsinin, habelə normallaşma prosesi çərçivəsində birbaşa ikitərəfli danışıqların dəstəkləməsinin əhəmiyyətini vurğulayıb.
Görüşdə 3 ölkə arasında mövcud çoxşaxəli əməkdaşlıq gündəliyindən irəli gələn məsələlər, regional əməkdaşlığın perspektivləri və digər ikitərəfli və çoxtərəfli məsələlər müzakirə olunub.
Sonda üçtərəfli görüşün yekunlarına dair Bakı Bəyannaməsi imzalanıb, habelə təşkil olunmuş mətbuat konfransı çərçivəsində nazirlər bəyanatlarla çıxış ediblər.
Bəyannamə kifayət qədər əhatəlidir, tərəflər sülh prosesi istiqamətində səylərin maksimum artırılmasını, bütün sferalarda münasibətlərin dərinləşməsini, regional və ikitərəfli proseslərdə qarşılılıq dəstəkləri, təhlükəsizlik, enerji, nəqliyyat məsələlərində davamlı və gücləndirilmiş əməkdaşlığı təsdiq ediblər.
Qeyd edək ki, Ceyhun Bayramov Azərbaycan-Gürcüstan-Türkiyə xarici işlər nazirlərinin 9-cu üçtərəfli görüşündə iştirak məqsədilə ölkəmizdə səfərdə olan Türkiyə Respublikasının Xarici İşlər Naziri Hakan Fidanla ikilikdə də görüşüb.
Təkbətək görüş zamanı Azərbaycan və Türkiyə arasında mövcud müttəfiqlik münasibətlərinin inkişaf perspektivləri, habelə cari regional vəziyyət ətrafında fikir mübadiləsi aparılıb.
Ceyhun Bayramov
Nazir Ceyhun Bayramov qardaşlıq və dostluğa əsaslanan Azərbaycan-Türkiyə münasibətlərinin inkişafında müşahidə olunan dinamikanın, xüsusilə müttəfiqlik əlaqələrimizi təsbit edən Şuşa Bəyannaməsinin imzalanması ilə yeni müstəviyə qədəm qoyan əlaqələrimizin məmnunluq doğurduğunu qeyd edib. İkitərəfli müttəfiqlik münasibətlərinin regional, habelə beynəlxalq platformalar çərçivəsində özünü nümayiş etdirdiyi, qarşılıqlı dəstək və həmrəyliyimizi möhkəmləndirdiyi diqqətə çatdırılıb. Qarşı tərəf cari regional vəziyyət, Azərbaycan və Ermənistan arasında normallaşma və sülh prosesi, qarşıda duran çağırışlar barədə ətraflı məlumatlandırılıb. Ölkəmizin mövcud çətinlik və çağırışlara baxmayaraq sülh prosesinin irəlilədilməsində qərarlı olduğu, münasibətlərin normallaşmasının öz növbəsində regional sülh və təhlükəsizliyə töhfə verəcəyinə dair inamlı olduğumuz diqqətə çatdırılıb. Ceyhun Bayramov həmçinin cari ildə ölkəmizdə keçiriləcək BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasına (COP29) hazırlıq işlərindən irəli gələn məsələlərdən bəhs edərək, COP29-un əməkdaşlıq üçün yeni imkanlar yaratdığını bildirib.
Nazir Hakan Fidan görüş çərçivəsində qəbul olunmuş Bakı Bəyannaməsinin regional əməkdaşlığın inkişafına töhfə verəcəyinə dair inamını ifadə edib. Ölkəmizə COP29-a sədrliyi dövründə uğurlar arzu edən nazir Hakan Fidan, Türkiyənin COP29 çərçivəsində də hər zaman olduğu kimi qardaş Azərbaycanla əməkdaşlıq etməkdən məmnunluq duyacağını vurğulayıb.
Görüş zamanı həmçinin qarşılıqlı maraq doğuran digər məsələlər müzakirə olunub.
“Azərbaycanın Cənubi Qafqazın parlayan ulduzuna çevrilməsini Türkiyə fəxrlə izləyir”.
Bunu isə Hakan Fidan XI Bakı Qlobal Forumunda çıxış edərkən söyləyib: “Azərbaycan regional projelər, regional diplomatiya sahəsində haba çevrilib. Avropanın enerji təhlükəsizliyində Azərbaycan vacib rol oynayır. Bakının Avropa ilə enerji təhlükəsizliyi sahəsində əhəmiyyətli dialoqu var”.
Fidan bildirib ki, hazırda Azərbaycanla Ermənistan sülh müqaviləsinin imzalanmasına çox yaxındır: “Biz danışıqların sülh istiqamətində irəliləməsini tamamilə dəstəkləyirik”.
“Münaqişənin həll olunması ilə regional əməkdaşlığın gücləndirilməsi üçün münbit şərait yaranıb”. Bunu isə C.Bayramov Gürcüstanın xarici işlər naziri İliya Darçiaşvili ilə görüşdə deyib.
Görüş zamanı Azərbaycan və Gürcüstan arasında mövcud ikitərəfli, habelə çoxtərəfli əməkdaşlıq gündəliyindən irəli gələn məsələlər, həmçinin postmünaqişə dövründə regional vəziyyət müzakirə olunub.
Tərəflər Azərbaycan və Gürcüstan arasında dostluq və mehriban qonşuluq münasibətlərinin daha da inkişaf etdirilməsinin regional əməkdaşlığa öz töhfəsini verəcəyini əminliklə vurğulayaraq, bu istiqamətdə yüksək səviyyəli təmasların və siyasi məsləhətləşmələr mexanizminin əhəmiyyətini qeyd ediblər.
Xüsusilə iqtisadi sahədə əməkdaşlıq üçün mövcud potensialdan istifadənin, birgə layihələrin uğurla həyata keçirilməsinin zəruriliyi diqqətə çatdırılıb, bu xüsusda Azərbaycanla Gürcüstan arasında Birgə Hökumətlərarası Komissiyanın fəaliyyətinin vacib rolundan bəhs edilib.
Postmünaqişə dövründə mövcud regional vəziyyət, ölkəmizin bərpa, quruculuq, habelə sülh təşəbbüsləri barədə qarşı tərəfi ətraflı məlumatlandıran nazir Ceyhun Bayramov, keçmiş Ermənistan-Azərbaycan münaqişəsinin həll olunması ilə regional əməkdaşlığın gücləndirilməsi üçün münbit şəraitin yarandığını diqqətə çatdırıb. Bununla belə, sülh prosesinin qarşısında duran çağırışlar, xüsusilə bir sıra ölkələrin öz dar siyasi gündəliklərini regiona proyeksiya etməsinin sülh prosesinə mənfi təsir etdiyi də bildirilib.
Nazir İliya Darçiaşvili Gürcüstanın bu format çərçivəsində regional əməkdaşlığı daha da inkişaf etdirməkdə maraqlı olduğunu diqqətə çatdırıb.
Görüş zamanı həmçinin qarşılıqlı maraq doğuran digər məsələlər ətrafında fikir mübadiləsi aparılıb.
Qeyd edək ki, ekspertlər perspektivdə bu formatın genişlənə biləcəyini, uzun zamandan bəri müzakirə edilən 3+3 formatında davam etdiriləcəyini də istisna etmirlər. O da vurğulanır ki, Rusiyada keçirilən prezident seçkisindən sonra daha fərqli müstəvi açıla bilər. Habelə, İranın da prosesə marağı olduğu bəllidir.
O da məlumdur ki, Gürcüstan 3+3 formatında danışıqlarda maraqlı deyildi. Həmçinin Ermənistanın sülh müqaviləsi imzalamadan hər hansı regional proseslərdə iştirakı mümkünsüzdür.
Bu baxımdan hələlik qeyd edilən kontekstdə Azərbaycan, Türkiyə və Gürcüstanın bir arada olması mümkündür və güman edilir ki, müzakirələr nəticəsiz qalmayacaq…
Musavat.com
Short URL: http://www.cumhuriyyet.net/?p=199360
