Bütün pensiyaların artırılmamasının səbəbi açıqlandı – RƏSMİ
Əmək və Əhalinin Sosial Müdafiəsi Nazirliyi bütün növ pensiyaların artırılmamasına aydınlıq gətirib.
Nazirlikdən bildirilib ki, ölkədə növbəti sosial islahat paketinin tərkib hissəsi kimi, Prezident İlham Əliyevin təsdiq etdiyi yeni qanunla minimum aylıq əmək pensiyasının məbləği 2022-ci ilin əvvəlindən 20% artırılaraq 200 manatdan 240 manata çatdırılıb.
Bildirilib ki, bu artım pensiyalarının məbləği 240 manata qədər olan pensiyaçıları əhatə edir və onların pensiyaları yanvarın 1-dən 240 manata çatdırılaraq ödənilir:
“Pensiyaların bu ilin əvvəlindən indeksləşdirilərək artırılması isə ötən ilin orta aylıq nominal əməkhaqqının illik artım tempinə dair Dövlət Statistika Komitəsinin Əmək və Əhalinin Sosial Müdafiəsi Nazirliyinə təqdim edəcəyi rəsmi məlumata uyğun aparılacaq”.
Rəsmi məlumata görə, həmin artım tətbiq olunduqda bu barədə ictimaiyyətə məlumat veriləcək.
Qeyd edək ki, minimum pensiya artımı barədə məlumat pensiyaçılar arasında çaşqınlıq yaradıb. Pensiyaçılar sərəncamın bütün növ pensiyalara şamil edildiyi qənaətinə gəlib.
Short URL: https://www.cumhuriyyet.net/?p=169392