“Uber” məhkəməni uddu, Türkiyədə yenidən fəaliyyətə başlayacaq

“Uber” yenidən Türkiyədə fəaliyyət göstərəcək.

Musavat.com Türkiyə mətbuatına istinadən bildirir ki, ötən gün apellyasiya məhkəməsi “Uber” taksi xidmətinin fəaliyyəti ilə bağlı qadağanı ləğv edib. Beləliklə, “Uber” yenidən Türkiyədə fəaliyyətə başlayacaq.

Qeyd edək ki, “Uber” taksi xidməti 2014-cü ildən Türkiyədə populyarlaşmağa başlamışdı. Onun fəaliyyəti ilə bağlı qadağaya qədər ölkədə 4,5 milyona yaxın insan bu şirkətin xidmətindən istifadə etmişdi. 2018-ci ildə Türkiyədə bir çox taksi xidməti şirkətləri “”Uber”in onların bizneslərini dağıtdığını” iddia edərək şikayət etmişdilər. Nəticədə məhkəmə qərarı ilə “Uber”in Türkiyədəki fəaliyyəti dayandırılmışdı.

Xatırladaq ki, “Uber” taksi xidməti dünyada 2010-ci ildən fəaliyyətə başlayıb. Bu günə qədər şirkət 15 milyarddan çox müştəriyə xidmət göstərib. Hazırda “Uber” 66 ölkənin 700-dən çox şəhərində gündə 19 milyona yaxın sərnişin daşıyır.

Bununla belə, Bolqarıstan, Danimarka və Macarıstanda onun fəaliyyətinə qadağa qoyulub. Şirkət Fransa, İtaliya, Almaniya, Yaponiya və Tayvanda məhdudiyyətlərlə fəaliyyət göstərir.

Short URL: https://www.cumhuriyyet.net/?p=158781