FHN Sabirabad bazarındakı yanğın barədə

Fövqəladə Hallar Nazirliyindən verilən məlumata görə, 16 iyul tarixində səhər saatlarında quruma Sabirabad şəhərində Mərkəzi bazarın ərazisində yanğın olması barədə məlumat daxil olub.

İlkin məlumata əsasən, yanğın nəticəsində bazarın ərazisində iki mağaza və piştaxtalar 1300 kvadrat metr sahədə yanıb.

Yanğının söndürülməsinə DYMX-nın 11 texnikası cəlb edilib.

Yanğın saat 08:02 dəqiqədə yanğından mühafizə bölmələri tərəfindən söndürülüb. Bitişik mağazalar və bazarın qalan ərazisi yanğından mühafizə olunub.

Əlavə məlumat veriləcək.

*  *  *08:34

İndicə aldığımız məlumata görə, hadisə yerinə gəlmiş yanğınsöndürənlər tərəfindən alov lokallaşdırılaraq söndürülüb.

Yanğın nəticəsində rayonun ən böyük ticarət şəbəkəsi olan “Əmin Market”in bir mağazası və “Çıraq Market” yanıb. Yanğının ətraf ərazilərdəki ticarət obyektlərinə keçməsinə imkan verilməyib.

Hadisə nəicəsində hər iki ticarət şəbəkəsinə külli miqdarda ziyan dəyib.

Hazırda Sabirabad rayonunun rəhbərliyi də hadisə yerindədir. Faktla bağlı araşdırma aparılır.

*   *   *08:17

Bu gün səhər saatlarında Sabirabad rayonunun mərkəzi bazarında yanğın baş verib.

Virtualaz.org-un Şirvan bürosunun məlumatına görə, bazarın girişində yerləşən, rayonda ən böyük ticarət şəbəkəsi olan “Əmin market”in mərkəzi ofisinin yerləşdiyi anbardan başlayan yanğın qısa vaxt ərzində ətrafdakı 5-6 mağazaya da keçib.

Yanğınla bağlı elan edilmiş çağırışla Sabirabad və ətraf rayonların yanğınsöndürənləri hadisə yerinə cəlb edilib.

Hazırda yanğının söndürülməsi istiqamətində tədbirlər davam etdirilir.

Short URL: https://www.cumhuriyyet.net/?p=129559